യു.എ.ഇ പൗരൻമാർക്ക്​ വീട്​ വെക്കാൻ​ 630 കോടി ദിർഹമിന്‍റെ പാക്കേജ്​

ദുബൈ: യു.എ.ഇ പൗരൻമാരുടെ ഭവന നിർമാണത്തിന്​ 630 കോടി ദിർഹമിന്‍റെ പാക്കേജ്​ പ്രഖ്യാപിച്ച്​ യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം. സ്ഥലം വാങ്ങാനും വീടുവെക്കാനുമായിരിക്കും ഈ തുക നൽകുക. 4600ഓളം പൗരൻമാർക്ക്​ ഉപകാരപ്പെടും.

ഇമാറാത്തികൾക്കായി 1100 വില്ല ​റെസിഡൻഷ്യൽ കോംപ്ലക്സുകൾ നിർമിക്കുന്ന പദ്ധതിക്കും അംഗീകാരം നൽകിയതായി അദ്ദേഹം വ്യക്​തമാക്കി. യു.എ.ഇ പൗരൻമാരുടെ ജീവിത നിലവാരം ഉയർത്താൻ ലക്ഷ്യമിട്ടാണ്​ പാക്കേജ്​ പ്രഖ്യാപിച്ചത്​. അടുത്ത 20 വർഷത്തെ ഭവന പദ്ധതിക്കായി കഴിഞ്ഞ സെപ്​റ്റംബറിൽ 6500 കോടി ദിർഹമിന്‍റെ പദ്ധതി ശൈഖ്​ മുഹമ്മദ്​ പ്രഖ്യാപിച്ചിരുന്നു.

ഗുണനിലവാരമുള്ള താമസ സൗകര്യം ഓരോരുത്തരുടെയും അവകാശമാണെന്നും ജനങ്ങൾക്ക്​ മാന്യമായ താമസ സൗകര്യമൊരുക്കുക എന്നതാണ്​ സർക്കാരിന്‍റെ മുഖ്യ പരിഗണനയെന്നും ശൈഖ്​ മുഹമ്മദ്​ പറഞ്ഞു.