ആഘോഷങ്ങളിലേക്ക്​ അബൂദബിയും തുറക്കുന്നു

അബൂദബി: കോവിഡ്​ വ്യാപനത്തെ തുടർന്ന്​ നിർത്തിവെച്ചിരുന്ന പരിപാടികൾ അബൂദബിയിലേക്ക്​ തിരിച്ചെത്തുന്നു. രണ്ടാഴ്​ചക്കുള്ളിൽ എമിറേറ്റിലെ വിനോദപരിപാടികൾ അടക്കം പുനരാരംഭിക്കുമെന്ന്​ ദുരന്ത നിവാരണ സമിതി അറിയിച്ചു. ഇതിനുള്ള പ്രവർത്തനങ്ങൾ അധികൃതർ തുടങ്ങി​. കോവിഡ്​ പോസിറ്റിവ്​ കേസുകൾ കുറഞ്ഞതോടെയാണ്​ നിയന്ത്രണങ്ങൾ നീക്കുന്നത്​. ടൂറിസം, സാമ്പത്തിക -സാംസ്​കാരിക പരിപാടികൾ, വിനോദ പരിപാടികൾ എന്നിവയാണ്​ പുനരാരംഭിക്കുന്നത്​. എന്നാൽ, കോവിഡ്​ ടെസ്​റ്റ്​, ക്വാറൻറീൻ അടക്കമുള്ള നിയന്ത്രണങ്ങൾ തുടരുമെന്ന സൂചനയും അധികൃതർ നൽകിയിട്ടുണ്ട്​.

ദുബൈയിൽ നിയന്ത്രണങ്ങൾ നേരത്തെ നീക്കിയിരുന്നെങ്കിലും അബൂദബി അടഞ്ഞുകിടക്കുകയായിരുന്നു. വിദേശത്തുനിന്നെത്തുന്നവർക്ക്​ 14 ദിവസ ക്വാറൻറീൻ നിർബന്ധമുള്ള ഏക എമിറേറ്റ്​ അബൂദബിയാണ്​. എമിറേറ്റിലേക്ക്​ പ്രവേശിക്കുന്നവർ നാലാം ദിവസവും എട്ടാം ദിവസവും കോവിഡ്​ പരിശോധന നടത്തണമെന്ന നിബന്ധനയുമുണ്ട്​. നിയന്ത്രണങ്ങളുടെ ഫലമായി അബൂദബിയിൽ കോവിഡിനെ ഏറക്കുറെ പിടിച്ചുകെട്ടാനായെന്ന വിലയിരുത്തലി​െൻറ അടിസ്​ഥാനത്തിലാണ്​ തുറക്കൽ നീണ്ടത്​. എന്നാൽ, പോസിറ്റിവ്​ കേസുകൾ എമിറേറ്റിൽ കുറഞ്ഞതോടെയാണ്​ ആഘോഷങ്ങൾക്ക്​ അനുമതി നൽകുന്നത്​. അബൂദബിയിൽ വീടുകൾ തോറുമുള്ള പരിശോധനയുണ്ട്​. ഇത്​ തുടരും. സെപ്റ്റംബർ മുതൽ ചില മേഖലകൾ തുറന്നെങ്കിലും നിശ്ചിത എണ്ണം ആളുകൾക്ക്​ മാത്രമേ ​പ്രവേശനം അനുവദിച്ചിരുന്നുള്ളൂ.