അബൂദബി ടാക്‌സികളിൽ മറന്നുവെച്ച 87 ശതമാനം സാധനങ്ങളും തിരികെ നൽകി

അബൂദബി: തലസ്ഥാനത്തെ ടാക്‌സികളിൽ യാത്രക്കാർ മറന്നുവെച്ച വസ്തുക്കളിൽ 87 ശതമാനവും ഉടമകൾക്ക്​ മടക്കി നൽകിയതായി അധികൃതർ അറിയിച്ചു. മുനിസിപ്പാലിറ്റീസ് ആൻഡ് ട്രാഫിക്​ വകുപ്പിനു​ കീഴിൽ പ്രവർത്തിക്കുന്ന സംയോജിത ഗതാഗതകേന്ദ്രത്തിൽ കഴിഞ്ഞവർഷം 12,000 പരാതികൾ ലഭിച്ചു.

യാത്രാവസാനം ട്രിപ്പ് േഡറ്റ, സമയം, വാഹന നമ്പർ, ഡ്രൈവറുടെ പേര് എന്നിവ സൂചിപ്പിക്കുന്ന പേ​െമൻറ്​ രസീത് ഡ്രൈവറിൽ നിന്ന് നിർബന്ധമായും വാങ്ങണമെന്ന് അധികൃതർ ഓർമിപ്പിച്ചു. യാത്രക്കിടെ ടാക്‌സികളിൽ എന്തെങ്കിലും മറക്കുകയോ നഷ്​ടപ്പെടുകയോ ചെയ്താൽ തിരികെ ലഭിക്കാൻ ഇത്​ ഉപകരിക്കും.

അബൂദബിയിലെ ടാക്‌സി സേവനത്തിനു കീഴിൽ 6,390 വാഹനങ്ങളാണ് നിരത്തിലുള്ളത്. ഇതിൽ 222ഉം എയർപോർട്ട് ടാക്‌സികളാണ്.ടാക്‌സി സേവനം സംബന്ധിച്ച പരാതികൾക്കും നിർദേശങ്ങൾക്കും 'അബൂദബി ഫെയർ' ആപ്ലിക്കേഷനാണ് ഉപയോഗിക്കുന്നത്​. ആപ്പ് ഉപയോഗിക്കുന്നരുടെ എണ്ണം വർധിച്ചുകൊണ്ടിരിക്കുകയാണെന്ന്​ കേന്ദ്രം വ്യക്തമാക്കി. 2020ൽ ഈ ആപ്പിലൂടെ 9,79,000 ടാക്‌സി റിസർവേഷനുകളാണ് നടത്തിയത്.