സർവേയിൽ പ​ങ്കെടുക്കുന്ന രക്ഷിതാക്കൾക്ക്​ സമ്മാനവുമായി അബൂദബി

അബൂദബി: അബൂദബി 'പേരൻറ്‌സ് സര്‍വേ'യില്‍ പങ്കെടുക്കുന്ന രക്ഷിതാക്കള്‍ക്ക് സമ്മാനവുമായി അബൂദബി വിദ്യാഭ്യാസ വകുപ്പ്​. അടുത്ത അക്കാദമിക് വര്‍ഷത്തെ കുട്ടികളുടെ ട്യൂഷന്‍ ഫീസ് ഇളവ്​ ഉൾപെടെയാണ്​ സമ്മാനം പ്രഖ്യാപിച്ചിരിക്കുന്നത്​.

കുട്ടികളുടെ പഠനം, സ്‌കൂള്‍ ജീവിതത്തെ അവര്‍ എങ്ങനെ ആസ്വദിക്കുന്നു തുടങ്ങിയ വിവരങ്ങളാണ് രക്ഷിതാക്കള്‍ സര്‍വേയുടെ ഭാഗമായി നല്‍കേണ്ടത്. മക്കളുടെ സ്‌കൂള്‍ ജീവിതവുമായി ബന്ധപ്പെട്ട് രക്ഷിതാക്കള്‍ നേരിടുന്ന വെല്ലുവിളികളും മറ്റും തിരിച്ചറിയുന്നതിനും കുട്ടികളുടെ ഭാവിയെ സഹായിക്കുന്നതിനും പ്രശ്​നങ്ങൾക്ക്​ പരിഹാരങ്ങള്‍ കണ്ടെത്തുന്നതിനുമാണ് സര്‍വേ. നവംബര്‍ 22ന്​ മുൻപ്​ 15 മിനിറ്റ് മാത്രം

ദൈര്‍ഘ്യമുള്ള സര്‍വേയില്‍ പങ്കെടുക്കുന്നവര്‍ക്കാണ് സമ്മാനങ്ങൾ ലഭിക്കുകയെന്ന് അധികൃതര്‍ വ്യക്തമാക്കി. ഹോട്ടൽ താമസം, ടൂറിസം വൗച്ചർ, ഷോപ്പിങ് മാള്‍ വാച്ചർ, പാര്‍ക്കുകളിലേക്കുള്ള പ്രവേശന ടിക്കറ്റുകൾ, ജിംനേഷ്യത്തില്‍ മൂന്നുമാസത്തേക്ക് അംഗത്വം അടക്കമുള്ള മറ്റു സമ്മാനങ്ങളും വിദ്യാഭ്യാസ വകുപ്പ് വാഗ്ദാനം ചെയ്യുന്നുണ്ട്. https://adek.qualtrics.com/jfe/form/SV_ahojgvWmQhUyaHQ എന്ന ലിങ്ക്​ വഴിയാണ്​ സർവേയിൽ പ​ങ്കെടുക്കേണ്ടത്​.