അബൂദബി നിക്ഷേപ അതോറിറ്റി ഇന്ത്യയിൽ മുതൽ മുടക്കാനൊരുങ്ങുന്നു പ്രഖ്യാപനം ഇൗ മാസം 

ദുബൈ: അബൂദബി നിക്ഷേപ അതോറിറ്റി (എ.ഡി.​െഎ.എ) ഇന്ത്യയിൽ പശ്​ചാത്തല സൗകര്യ വികസന, ഭവന നിർമാണ പദ്ധതികളിൽ മുതൽ മുടക്കാൻ ഒര​ുങ്ങുന്നു. വിമാനത്താവള വികസനം, പാരമ്പര്യേതര ഉൗർജം തുടങ്ങിയ മേഖലകളിൽ നിക്ഷേപം നടത്തുന്നതു സംബന്ധിച്ച ഒൗദ്യോഗിക പ്രഖ്യാപനം ഇൗ മാസം തന്നെയുണ്ടാവും. ഹൈവേ വികസനം മുതൽ റെയിൽവേ സ്​റ്റേഷൻ നവീകരണം വരെ വിപുലമായ മേഖലകളിൽ നിക്ഷേപ സാധ്യത സംബന്ധിച്ച ചർച്ചകളും നടക്കുന്നതായി ഒക്​ടോബറിൽ നടക്കുന്ന ഇന്ത്യ^യു.എ.ഇ പങ്കാളിത്ത ഉച്ചകോടിയുടെ പ്രഖ്യാപന വാർത്താ സമ്മേളനത്തിൽ സംസാരിക്കവെ യു.എ.ഇയിലെ ഇന്ത്യൻ അംബാസഡർ നവ്​ദീപ്​ സിങ്​ സൂരി വ്യക്​തമാക്കി. എന്നാൽ നിക്ഷേപ മൂല്യം എത്രയെന്ന്​ അദ്ദേഹം വെളിപ്പെടുത്തിയില്ല. 

ഇരു രാജ്യങ്ങളും സംയുക്​തമായി തയ്യാറാക്കിയ യു.എ.ഇ^ഇന്ത്യ പശ്​ചാത്തല വികസന നിക്ഷേപ നിധിയുടെ ഭാഗമായി നടത്തിയ പരിശ്രമങ്ങളുടെ ഫലമാണ്​ വരാനിരിക്കുന്ന നിക്ഷേപം. പ്രധാനമന്ത്രി നരേന്ദ്രമോദിയുടെ യു.എ.ഇ സന്ദർശനത്തി​​െൻറ ഭാഗമായി 7500 കോടി ഡോളറി​​െൻറ നിക്ഷേപം ലക്ഷ്യമിടുന്ന പ്രഖ്യാപനമുണ്ടായിരുന്നു. ദുബൈ പോർട്ട്​ 100 കോടി ഡോളറി​​െൻറ നിക്ഷേപത്തിന്​ ഇതിനകം ധാരണാപത്രം ഒപ്പുവെച്ചതായും ഇരു രാജ്യങ്ങൾക്കും പ്രയോജനകരമായ കൂടുതൽ പദ്ധതികളിൽ നിക്ഷേപ സാധ്യത ആരാഞ്ഞ്​ ചർച്ചകൾ നടക്കുന്നതായും അംബാസഡർ പറഞ്ഞു.  ഇൗയിടെ നടത്തിയ കേരള സന്ദർശനം തികച്ചും മതിപ്പുളവാക്കുന്നതായിരുന്നുവെന്ന്​ അദ്ദേഹം അഭിപ്രായപ്പെട്ടു. ലുലു, ആസ്​റ്റർ, വി.പി.എസ്​ തുടങ്ങിയ യു.എ.ഇയിലെ  ഇന്ത്യൻ വ്യവസായ ഗ്രൂപ്പുകൾ അവിടെ നടത്തിയ നിക്ഷേപം ഇരു രാജ്യങ്ങളും തമ്മിലെ ബന്ധം കൂടുതൽ കരുത്തുറ്റതാക്കും. 

ദുബൈയിൽ നടക്കുന്ന 2020 എക്​സ്​പോയിൽ ഇന്ത്യ പ​െങ്കടുക്കും. ഇതി​നു മുന്നോടിയായി യു.എ.ഇ പ്രതിനിധി സംഘം ഇന്ത്യ സന്ദർശിക്കും. വരും ദിവസങ്ങളിൽ ഇതു സംബന്ധിച്ച പ്രഖ്യാപനമുണ്ടാകുമെന്നും ഇരു രാജ്യങ്ങളും തമ്മിലെ ബന്ധത്തി​​െൻറ അന്തസത്ത പ്രതിഫലിപ്പിക്കുന്ന രീതിയിലാവും ഇന്ത്യയുടെ പങ്കാളിത്തമെന്നും അംബാസഡർ കൂട്ടിച്ചേർത്തു.