സഹായവിളികൾക്ക്​ നിമിഷങ്ങൾക്കകം സേവനമെത്തിച്ച്​ അബൂദബി പൊലീസ്​ 

അബൂദബി: വിളിച്ചാൽ വിളിപ്പുറത്തെത്തുന്ന അബൂദബി പൊലീസി​​െൻറ സഹായം തേടിയെത്തുന്ന ഫോൺവിളികളിൽ വൻ വർധന. ഇൗ വർഷത്തെ ആദ്യ ഏഴു മാസങ്ങളിൽ മാത്രം 15 ലക്ഷത്തോളം കോളുകളാണ്​ പൊലീസി​​െൻറ അടിയന്തിര സഹായ നമ്പറായ 999ൽ എത്തിയത്​. പലപ്പോഴും ഒാരോ മിനിറ്റിലും അഞ്ച്​ കോളുകൾ. എന്നാൽ ഇവയെല്ലാം അടിയന്തിര സഹായം എത്ത​ിക്കേണ്ട വിഷയങ്ങളായിരുന്നില്ലെന്ന്​ ഒാപ്പറേഷൻസ്​ വിഭാഗം ഡയറക്​ടർ കേണൽ നാസർ അൽ മസ്​കരി പറഞ്ഞു. 

അബൂദബിയിൽ നിന്ന്​ 980,066 വിളികളാണെത്തിയത്​. അൽ​െഎനിൽ നിന്ന്​ 415,330 ഉം അൽ റഫ്​റയിൽ നിന്ന്​ 80,986 ഉം വിളികളെത്തി. കുറ്റകൃത്യങ്ങൾ സംബന്ധിച്ച വിവരങ്ങൾ മുതൽ ഗതാഗത പ്രശ്​നങ്ങൾ വരെയും സ്​ഥലങ്ങളും വഴികളുമന്വേഷിച്ചുള്ള വിളികളും ഇതിലുൾപ്പെടും. വാഹനം ബ്രേക്ക്​ഡൗണായി വഴിയിൽ കുടുങ്ങിയവരും സഹായം തേടി വിളിച്ചിരുന്നു. 

അത്യാധുനിക ഹൈടെക്​ സംവിധാനങ്ങൾ ഒരുക്കിയിരിക്കുന്ന കൺട്രോൾ റൂമുകളിൽ ഫോൺ കാളുകൾ എത്തിയാലുടൻ തുടർനടപടികൾ സജ്ജീകരിക്കാൻ അതാതിടങ്ങളിലെ ഉദ്യോഗസ്​ഥർക്ക്​ നിർദേശമെത്തും. ഉടനടി പൊലീസ്​ പട്രോൾ സംഘങ്ങൾ സംഭവസ്​ഥലത്തേക്ക്​ കുതിക്കും. സന്ദർഭാനുസരണം ​എയർവിങ്​, ആംബുലൻസ്​, കമ്യുനിറ്റി ​പൊലീസ്​, ദ്ര​ുതകർമയൂനിറ്റ്​, ഫോറൻസിക്​ വിഭാഗം എന്നിവയുടെ സംവിധാനങ്ങളും ലഭ്യമാവും.  

അടിയന്തിര ഘട്ടങ്ങളിൽ മാത്രം 999 നമ്പർ ഉപയോഗിക്കണമെന്ന്​ അധികൃതർ അഭ്യർഥിച്ചു. അല്ലാത്ത പക്ഷം അത്യാവശ്യ സഹായം തേടുന്ന പലർക്കും സേവനം എത്തിക്കുന്നതിന്​ ഇത്​ താമസം വരുത്തും.സഹായം തേടിയുള്ള വിളികൾ മുൻവർഷത്തെ ​അപേക്ഷിച്ച്​ വർധിച്ചിരിക്കയാണ്​. ഇൗ വർഷം ഏഴുമാസം കൊണ്ട്​ 1,476,382 കാളുകളാണ്​ ലഭിച്ചതെങ്കിൽ കഴിഞ്ഞ വർഷം ഇത്​ 1,227,645 ആയിരുന്നു.പ്രത്യേക പരിഗണന ആവശ്യമായ ആളുകൾക്ക്​ കൂടുതൽ കരുതലോടെ സഹായമെത്തിക്കാനും പൊലീസ്​ സജ്ജമാണെന്ന്​ കേണൽ അൽ മസ്​റക്കി പറഞ്ഞു.  5999 എന്ന നമ്പറിൽ എസ്​.എം.എസ്​ അയച്ചാലും പൊലീസ്​ ഉടനടി ഇടപെടും.