സാലിക്​ ഗതാഗത തിരക്കുള്ള സമയത്ത്​ മാത്രം  –അബൂദബി ഗതാഗത വകുപ്പ്​

അബൂദബി: ഗതാഗത തിരക്കുള്ള സമയങ്ങളിൽ മാത്രമേ റോഡ്​ ചുങ്കം (സാലിക്​) ഇൗടാക്കൂ എന്ന്​ അബൂദബി ഗതാഗത വകുപ്പ്​ വ്യക്​തമാക്കി. റോഡിൽ വാഹനത്തിരക്കുണ്ടാകുന്ന സമയങ്ങളിൽ ടോൾഗേറ്റ്​ പ്രവർത്തിപ്പിക്കുന്നതിനെ കുറിച്ച്​ അവലോകനം നടത്തിക്കൊണ്ടിരിക്കുകയാണെന്ന്​ ഗതാഗത വകുപ്പ്​ അണ്ടർ സെക്രട്ടറി ഖലീഫ മുഹമ്മദ്​ ആൽ മസ്​റൂഇ വ്യക്​തമാക്കി. രാവിലെയും വൈകുന്നേരവും അബൂദബിയിലെ റോഡിലെ തിരക്ക്​ ഒഴിവാക്കുന്നതിനാണ്​ ടോൾ ഗേറ്റ്​ സ്​ഥാപിക്കുന്നതെന്ന്​ അൽ ബതീൻ കൗൺസിലിൽ നടന്ന പ്രഭാഷണത്തിൽ അദ്ദേഹം പറഞ്ഞു. പൊതു ഗതാഗത സംവിധാനങ്ങൾ ഉപയോഗിക്കുന്നവർക്കും നടപടി സഹായകമാകുമെന്നും കൂട്ടിച്ചേർത്തു.

ഉപഭോക്​താക്കളുടെ ആവശ്യം പരിഗണിച്ച്​ പൊതുഗതാഗത സംവിധാനങ്ങൾ വർധിപ്പിച്ചതായി ഗതാഗത വകുപ്പിലെ സമഗ്ര ഗതാഗത കേ​ന്ദ്രം ഡയറക്​ടർ ജനറൽ മുഹമ്മദ്​ റാശിദ്​ ആൽ ഖാംസി പറഞ്ഞു. 2008ൽ 120 ബസുകളാണ്​ ഉണ്ടായിരുന്നതെങ്കിൽ ഇപ്പോൾ 546 ബസുകളുണ്ട്​. ടാക്​സികളുടെ എണ്ണവും വർധിച്ചിട്ടുണ്ട്​. 2008ൽ 904 ടാക്​സികളാണ്​ ഉണ്ടായിരുന്നത്​. 2017ൽ ടാക്​സികളുടെ എണ്ണം 6,698 ആയി ഉയർന്നു. 

98 ശതമാനം പേരും ഇപ്പോൾ നിശ്ചിത പാർക്കിങ്​ സ്​ഥലങ്ങളിൽതന്നെ പാർക്ക്​ ചെയ്യുന്നതായും ക്രമരഹിതമായ പാർക്കിങ്​ ഇല്ലാതാക്കാൻ സാധിച്ചതായും ഗതാഗത^പാർക്കിങ്​ മേധാവി മുഹമ്മദ്​ ഹമദ്​ ആൽ മുഹൈരി വ്യക്​തമാക്കി. പ്രദേശത്തെ ജനങ്ങൾക്കായി 30000 പാർക്കിങ്​ പെർമിറ്റുകൾ രജിസ്​റ്റർ ചെയ്​തിട്ടുണ്ട്​. ഇവയിൽ 3500 പെർമിറ്റുകൾ വില്ലകളിൽ താമസിക്കുന്നവരുടെ വാഹനങ്ങൾക്കുള്ളതാണ്​. പെർമിറ്റുകൾ ഒരു മാസത്തിനകം പുതുക്കാൻ സാധിക്കും. 
സായിദ്​ സ്​പോർട്​സ്​ സിറ്റി, കോർണിഷ്​ പ്രദേശങ്ങളിൽ ‘പാർക്ക്​ ആൻഡ്​ റൈഡ്​’ സേവനം ലഭ്യമാക്കാനുള്ള പദ്ധതികൾ പുരോഗതിയിലാണെന്നും അദ്ദേഹം വ്യക്​തമാക്കി.