റാസൽഖൈമയിൽ വാഹനാപകടം: രണ്ട്​ മലയാളി യുവാക്കൾ മരിച്ചു

ദുബൈ: യു.എ.ഇയിലെ റാസൽഖൈമയിൽ ഇന്ന്​ പുലർച്ചെയുണ്ടായ വാഹനാപകടത്തിൽ രണ്ടു പേർ മരിച്ചു. മൂന്നുപേർക്ക്​ ഗുരുതര പരിക്കുണ്ട്​. തിരുവനന്തപുരം സ്വദേശി അർജുൻ ഗോപകുമാർ (24), ആലുവ ചെങ്ങമനാട്​ സ്വദേശി അതുൽ വിമൽ തമ്പി (24) എന്നിവരാണ്​ മരിച്ചത്​. റാസൽ ഖൈമയിലെ ഹോട്ടൽ ജീവനക്കാരായിരുന്നു ഇരുവരും. ഇതേ ഹോട്ടലിൽ ജോലി ചെയ്യുന്ന വിനു രവീന്ദ്രൻ തീവ്ര പരിചരണ വിഭാഗത്തിൽ ചികിത്സയിലാണ്​.

ഇവർക്കൊപ്പം വാഹനത്തിലുണ്ടായിരുന്ന ​ശ്രേയസ്​ സേതുമാധവൻ, സഞ്​ജയ്​ എന്നീ സുഹൃത്തുക്കൾക്കും പരിക്കുണ്ട്​.  ഇവർ ടൂറിസം സ്​ഥാപനത്തിൽ ജോലി ചെയ്യുന്നവരാണ്​. മൂന്നാർ കേറ്ററിങ്​ കോളജിലെ പൂർവ വിദ്യാർഥികളാണിവർ. ഇവർ സഞ്ചരിച്ച വാഹനം പുലർച്ചെ ഒന്നരക്ക്​ ജുൽഫാർ ടവറിനു സമീപം ഡിവൈഡറിൽ ഇടിച്ച്​ മറിയുകയായിരുന്നു.