അദീബ്​ അഹമദ്​ ഫിക്കി മിഡിലീസ്റ്റ് ചെയർമാൻ

ദുബൈ: ലുലു ഫിനാൻഷ്യൽ ഹോൾഡിംഗ്സ്​ മാനേജിങ്​ ഡയറക്ടർ അദീബ് അഹമദിനെ മിഡിലീസ്റ്റ് കൗൺസിലിൽ ഫെഡറേഷൻ ഓഫ് ഇന്ത്യൻ ചേമ്പേഴ്സ് ഓഫ് കൊമേഴ്സ് ആൻഡ്​ ഇൻഡസ്ട്രി (ഫിക്കി) ചെയർമാനായി നിയമിച്ചു. ഡൽഹിയിൽ നടന്ന ഫിക്കി മിഡിലീസ്റ്റ് കൗൺസിലിന്‍റെ ആറാം യോഗത്തിലാണ് തിരഞ്ഞെടുത്തത്.

ഫിക്കി സെക്രട്ടറി ജനറൽ ശൈലേഷ് പതക്, സീനിയർ ഡയറക്ടറും ആഫ്രിക്ക, മിഡിലീസ്റ്റ്, സൗത്ത് ഏഷ്യ റീജിയൻ ഹെഡുമായ ഗൗതം ഘോഷ്, ജോയിന്‍റ്​ ഡയറക്ടറും, ആഫ്രിക്ക, മിഡിലീസ്റ്റ്, സൗത്ത് ഏഷ്യ ഹെഡുമായ ദീപ്തി പന്ത് തുടങ്ങിയവർ പങ്കെടുത്തു.

ഇരുമേഖലകളിലെയും വ്യാവസായിക രംഗത്ത് വർദ്ധിച്ചുവരുന്ന നിക്ഷേപ അവസരങ്ങളെക്കുറിച്ച്​ ചർച്ച ചെയ്തു. ഷാർജ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി ചെയർമാൻ അബ്ദുല്ല സുൽത്താൻ അൽ ഉവൈസിന്‍റെ നേതൃത്വത്തിലുള്ള പ്രത്യേക സംഘത്തെ ഉച്ചകോടി സ്വാഗതം ചെയ്തു. വിദേശകാര്യ മന്ത്രാലയത്തിലെ ഡെവലപ്മെന്‍റ്​ പാർട്ണർഷിപ്പ് ജോയിന്‍റ് സെക്രട്ടറി സതീഷ് ശിവൻ, ദുബൈയിലെ ഇന്ത്യൻ കോൺസൽ ജനറൽ ഡോ. അമൻ പുരി എന്നിവരും പങ്കെടുത്ത ചർച്ചയും നടന്നു.

ഒമാനിലെ ഓയിൽ സാധ്യതകളെക്കുറിച്ച്​ സെമിനാറും നടത്തി. വർഷങ്ങളായി ഇന്ത്യൻ വ്യാവസായ രംഗത്ത് സജീവമായ അദീബ് അഹമ്മദ് ജി.സി.സി രാജ്യങ്ങളും ഇന്ത്യയും തമ്മിലെ വ്യാവസായിക ബന്ധം മെച്ചപ്പെടുത്താൻ പിന്തുണയും നൽകി വരുന്നുണ്ട്.