വ്യോമയാന രംഗത്തെ പുതുവിഭവങ്ങളുമായി എയർപോർട്ട്​ ഷോ

ദുബൈ: വ്യോമയാന രംഗത്തെ ഏറ്റവും വലിയ പ്രദർശനമായ ദുബൈ എയർപോർട്ട്​ ഷോയുടെ 20ാം എഡിഷൻ വേൾഡ്​ ട്രേഡ്​ സെൻററിൽ തുടങ്ങി.ദുബൈ സിവിൽ ഏവിയേഷൻ പ്രസിഡൻറും എയർപോർട്ട്​ ചെയർമാനും എമിറേറ്റ്​സ്​ സി.ഇ.ഒയുമായ ശൈഖ്​ അഹ്​മദ്​ ബിൻ സഈദ്​ ആൽ മക്​തൂം ഉദ്​ഘാടനം ചെയ്​തു. 21 രാജ്യങ്ങളിലെ 95 സ്​ഥാപനങ്ങളാണ്​ പ്രദർശനത്തിനുള്ളത്​.

കോവിഡ്​ കാലമായതിനാൽ സന്ദർശകർക്ക്​ മൂന്ന്​ രീതിയിലുള്ള ആസ്വാദന സൗകര്യമാണ്​ ഒരുക്കിയത്​. നേരിട്ട്​ കാണാൻ ആഗ്രഹിക്കുന്നവർക്ക്​ മുൻകൂട്ടി രജിസ്​റ്റർ ചെയ്​ത ശേഷം ദുബൈ വേൾഡ്​ ട്രേഡ്​ സെൻററിലെത്താം.അല്ലാത്തവർക്ക്​ പുതിയ ഓൺലൈൻ പ്ലാറ്റ്​ഫോമിലൂടെ ആസ്വദിക്കാം. ഓൺലൈനും ഓഫ്​ലൈനും താൽപര്യമുള്ളവർക്ക്​ അതിനും സൗകര്യമുണ്ട്​.അറേബ്യൻ ട്രാവൽ മാർക്കറ്റിന്​ പിന്നാലെ എയർപോർട്ട്​ ഷോ കൂടി എത്തിയത്​ യു.എ.ഇയിലെ ട്രാവൽ രംഗത്ത്​ കൂടുതൽ ഉണർവേകും.

മന്ദഗതിയിലായ വിനോദസഞ്ചാര രംഗം സജീവമാക്കാനാണ്​ ​പ്രദർശനം നടത്തുന്നത്​. കഴിഞ്ഞ വർഷം ലോക്​ഡൗണായിരുന്നതിനാൽ ഷോ മാറ്റിവെച്ചിരുന്നു.ഏവിയേഷൻ രംഗത്തെ പുത്തൻ ട്രെൻഡുകളും സാ​ങ്കേതിക കുതിപ്പും പരിചയപ്പെടുത്തുന്നതാണ് ഇക്കുറിയും​ എയർപോർട്ട്​ ഷോ. കോവിഡിനൊപ്പം എങ്ങനെ സുരക്ഷിത യാത്രയൊരുക്കാം എന്നതും എയർപോർട്ട്​ ഷോയിൽ പരിചയപ്പെടുത്തുന്നു.

വിദഗ്​ധർ നയിക്കുന്ന സംവാദങ്ങളും അരങ്ങേറുന്നുണ്ട്​. യു.എ.ഇയിലെ സർക്കാർ വകുപ്പുകൾ ഉൾപ്പെടെ പ്രദർശനത്തിനുണ്ട്​.ദുബൈ വിമാനത്താവളത്തിലെ സ്​മാർട്ട്​ ഗേറ്റ്​ സംവിധാനങ്ങൾ ലോകത്തിന്​ മുന്നിൽ പരിചയപ്പെടുത്തും. വിമാനത്താവള സുരക്ഷ, വർധിച്ചുവരുന്ന യാത്രക്കാർക്ക്​ സമയബന്ധിതമായി സേവനം നൽകൽ, ഉപഭോക്​തൃ സേവനം മെച്ചപ്പെടുത്താനുള്ള പുതിയ സാ​ങ്കേതിക വിദ്യ, ബാഗേജ്​ കൈകാര്യം ചെയ്യൽ, എയർ ട്രാഫിക്​ കൺട്രോൾ, ഗ്രൗണ്ട്​ ഹാൻഡ്​ലിങ്​ എന്നിവ ഷോയിലുണ്ട്​.