റെക്കോഡ്​ തിരുത്തി​ അൽ ഖുദ്ര; ഏറ്റവും നീളമേറിയ സൈക്കിൾ പാത

ദുബൈ: ലോകത്തിലെ ഏറ്റവും ദൈർഘ്യമേറിയ തുടർച്ചയുള്ള സൈക്കിൾ പാതയെന്ന സ്വന്തം റെക്കോഡ്​ തിരുത്തിക്കുറിച്ച്​ ദുബൈ അൽ ഖുദ്രയിലെ സൈക്കിൾ ട്രാക്ക്​. 80.6 കിലോമീറ്റർ പാതയൊരുക്കിയാണ്​ ഗിന്നസ്​ റെക്കോഡ്​ തിരുത്തിയെഴുതിയത്​. 2020ൽ 33 കിലോമീറ്ററായിരുന്നപ്പോൾ എഴുതിയെടുത്ത റെക്കോഡാണ്​ തിരുത്തിയത്​.

ദുബൈ റോഡ്​ ആൻഡ്​ ട്രാൻസ്​പോർട്ട്​ അതോറിറ്റിയാണ്​ ഇക്കാര്യം അറിയിച്ചത്​. ആർ.ടി.എയുടെയും ഗിന്നസ്​ റെക്കോഡിന്‍റെയും നേട്ടങ്ങളും ലോഗോകളും ആലേഖനം ചെയ്ത മാർബിൾ ഫലകം അൽ ഖുദ്രയിൽ സ്ഥാപിച്ചു.

ഈ സൈക്കിൾ പാതക്കൊപ്പം 135 കിലോമീറ്റർ ദൈർഘ്യമുള്ള ഉപപാതകളുമുണ്ട്​. വിശ്രമിക്കാൻ ഇരിപ്പിടങ്ങൾ, റസ്റ്റാറന്‍റുകൾ, ശുചിമുറി തുടങ്ങിയ സൗകര്യ​ങ്ങളെല്ലാം ഈ ദീർഘ ദൂര പാതയിലുണ്ട്​. സ്വന്തമായി സൈക്കിളില്ലാത്തവർക്ക്​ ഇവിടെയെത്തിയാൽ സൈക്കിൾ വാടകക്കെടുക്കാം. അടിയന്തര ആവശ്യങ്ങൾക്ക്​ വിളിക്കാൻ 30 ഇടങ്ങളിൽ എമർജൻസി ഫോൺ സൗകര്യമൊരുക്കിയിട്ടുണ്ട്​.

ദുബൈയെ സൈക്കിൾ സൗഹൃദ നഗരമാക്കുക എന്ന ലക്ഷ്യത്തിന്‍റെ വിജയമാണിതെന്ന്​ ട്രാഫിക്​ ആൻഡ്​ റോഡ്​ ഏജൻസി സി.ഇ.ഒ മൈത്ത ബിൻ അദായ്​ പറഞ്ഞു. ഉന്നത നിലവാരത്തിലാണ്​ സൈക്കിൾ ട്രാക്ക്​ നിർമിച്ചിരിക്കുന്നത്​. സൈക്ലിസ്റ്റുകൾക്കായി സൂചന ബോർഡുകൾ എല്ലായിടത്തും സ്ഥാപിച്ചിട്ടുണ്ട്​.

മണൽക്കൂനകൾക്കും തടാകങ്ങൾക്കും സമീപത്ത്​ കൂടെയാണ്​ ട്രാക്ക്​ കടന്നുപോകുന്നത്​. ഇത് ആഗോളതലത്തിൽ സൈക്ലിംഗ് പ്രൊഫഷണലുകളുടെ ഇഷ്ടകേന്ദ്രമാക്കാൻ സഹായിക്കുന്നതായും മൈത്ത ബിൻ അദായ്​ പറഞ്ഞു.

ദുബൈയിൽ 524 കിലോമീറ്റർ സൈക്കിൾ ട്രാക്കാണുള്ളത്​. 2026ഓടെ ഇത്​ 819 കിലോമീറ്ററാക്കി വർധിപ്പിക്കാനാണ്​ പദ്ധതി.