യു.എ.ഇക്ക്​ അഭിവാദ്യമർപ്പിച്ച്​  മലയാളി യുവാക്കളുടെ ആൽബം

ഉമ്മുല്‍ഖുവൈന്‍:  ദേശീയ ദിനമാഘോഷിക്കുന്ന യു.എ.ഇ.ക്ക് ആശംസ അറിയിച്ചും പ്രാർത്ഥനകൾ നേർന്നും മലയാളി യുവാക്കളുടെ   വീഡിയോ ആൽബം. കണ്ണൂർ സ്വദേശി ഇഖ്‌ബാൽ മടക്കരയും കോഴിക്കോട് കല്ലാച്ചി സ്വദേശി ഗഫൂർ ഷാസുമാണ് മനോഹരമായി ആൽബം ഒരുക്കിയിരിക്കുന്നത്. ഒപ്പം സ്വദേശിയായ അബ്ദുല്ല ബിൻ ശമ്മയും പാടിയിരിക്കുന്നു. 
ക​ുറെയേറെ വർഷങ്ങളായി ദേശീയ ദിന ഗാനങ്ങൾ ഒരുക്കുന്ന ഗഫൂർ ഷാസും ഇഖ്‌ബാലും ആദ്യമായി ഒന്നിക്കുന്ന ആൽബത്തിലെ യാ മുസാഫിർ മർഹബൻ ലിൽ ഇമാറാത്ത് എന്ന് തുടങ്ങുന്ന ഗാനം യു.എ.ഇ.യുടെ ഉദാര മനസ്കത വിവരിക്കുന്ന​ു. മലയാളത്തിലും അറബിയിലുമുള്ള വരികളുടെ രചനയും സംഗീതവും നിർവഹിച്ചത് ഇഖ്ബാലാണ്.  
അതി ബഹളങ്ങളോ അശ്ലീലങ്ങളോ ഇല്ലാതെ ശുദ്ധ സാഹിത്യത്തിൽ   പാട്ടുകളെഴുതിക്കൊണ്ടിരിക്കുന്ന  ഇഖ്‌ബാലി​​െൻറ പുതുതായി പുറത്തിറങ്ങാനിരിക്കുന്ന മാപ്പിളപ്പാട്ട് ആൽബത്തിൽ  പി ജയചന്ദ്രൻ, ശ്വേതാ മോഹൻ,  ഉണ്ണികൃഷ്ണൻ, കണ്ണൂർ ശരീഫ്, രതീഷ് കുമാർ തുടങ്ങിയവരൊക്കെ പാടുന്നുണ്ട്​. പത്ത് വർഷമായി   ദുബൈയിൽ സ്വകാര്യ സ്ഥാപനത്തിൽ ഓഡിറ്റ് വിഭാഗത്തിൽ ജോലിചെയ്​തു വരികയാണ്​. 
ഗഫൂർ ഷാസാവട്ടെ ഫാസ്റ്റ് ബിസിനസ്സ് എന്ന പേരിൽ സ്ഥാപനം നടത്തുന്നു. ഗഫൂറി​​െൻറ   ഉടമസ്ഥതയിലുള്ള  വിക്കി മീഡിയയാണ്   ഗാനം പുറത്തിറക്കിയിരിക്കുന്നത്. ഗോപുകൃഷ്ണ, ജാബിർ പുലാക്കൽ, ടിഷ തോമസ്, അശ്വിൻ എന്നിവർ അണിയറയിലുണ്ട്.