ഏഷ്യൻ കപ്പ്; യു.എ.ഇക്ക് വിജയത്തുടക്കം
text_fieldsഏഷ്യൻ കപ്പിൽ ഹോങ്കോങ്ങിനെതിരെ വിജയിച്ച യു.എ.ഇ ടീമംഗങ്ങളുടെ ആഹ്ലാദം
ദുബൈ: ഏഷ്യൻ കപ്പിൽ വിജയത്തുടക്കവുമായി വരവറിയിച്ച് യു.എ.ഇ. ദോഹ സിറ്റിയിലെ അൽ റയ്യാൻ ഖലീഫ ഇന്റർനാഷനൽ സ്റ്റേഡിയത്തിൽ നടന്ന ആദ്യ മത്സരത്തിൽ ഹോങ്കോങ്ങിനെ തകർത്താണ് കഴിഞ്ഞ വർഷത്തെ സെമി ഫൈനലിസ്റ്റുകൾ കൂടിയായ യു.എ.ഇ വരവറിയിച്ചത്. ഒന്നിനെതിരെ മൂന്നു ഗോളുകൾക്കാണ് യു.എ.ഇയുടെ ഗംഭീര വിജയം. കാണികൾ തിങ്ങിനിറഞ്ഞ സ്റ്റേഡിയത്തിൽ നടന്ന കളിയുടെ തുടക്കം മുതൽ മികച്ച പ്രകടനം കാഴ്ചവെച്ച യു.എ.ഇ ആദ്യ പാതിയിൽതന്നെ ഒരു ഗോൾ നേടി മുന്നിട്ടുനിന്നു. എന്നാൽ, രണ്ടാം പകുതിയുടെ തുടക്കത്തിൽ യു.എ.ഇയുടെ പ്രതിരോധനിരയെ തകർത്ത് ഹോങ്കോങ് ഒരു ഗോൾ നേടി സമനില പിടിക്കുകയായിരുന്നു. ഇതോടെ അപകടം മണത്ത യു.എ.ഇ കൂടുതൽ ശക്തമായ മുന്നേറ്റത്തിലൂടെ രണ്ട് ഗോളുകൾ കൂടി തിരിച്ചടിച്ച് വിജയം ഉറപ്പിക്കുകയായിരുന്നു. സുൽത്താൻ ആദിൽ, സെയ്ദ് സുൽത്താൻ, യഹ്യ അൽ ഖസ്സാനി എന്നിവരാണ് യു.എ.ഇക്കുവേണ്ടി ഗോൾ വല ചലിപ്പിച്ചത്.
കഴിഞ്ഞ രണ്ട് ടൂർണമെന്റിലും സെമിഫൈനലിസ്റ്റുകളായ യു.എ.ഇക്ക് ഹോങ്കോങ് വലിയ എതിരാളികളല്ലെങ്കിലും മികച്ച വിജയം നേടിയതിലൂടെ ടീമിന്റെ ആത്മവിശ്വാസം വർധിച്ചിട്ടുണ്ട്. കഴിഞ്ഞ വർഷത്തെ ചാമ്പ്യൻമാരായ ഇറാനുമായുള്ള മത്സരത്തിൽ ഈ വിജയം യു.എ.ഇക്ക് കരുത്താകുമെന്നാണ് വിലയിരുത്തൽ.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.