ആരോഗ്യ ഇൻഷുറൻസിൽ ആയുർവേദ, ഹോമിയോ ചികിത്സകളും

ദുബൈ: എമിറേറ്റിലെ അടിസ്​ഥാന ആരോഗ്യ ഇൻഷുറൻസ്​ പദ്ധതിയിൽ ആയുർവേദ, ഹോമിയോപ്പതി ചികിത്സകളും മനോരോഗ ചികിത്സയും ഉൾപ്പെടുത്തി.

മാസാന്ത വരുമാനം നാലായിരത്തിൽ കുറഞ്ഞ സാധാരണക്കാർ അംഗങ്ങളായ അടിസ്​ഥാന ഇൻഷുറൻസ്​ പദ്ധതിയിലെ മാറ്റം ഇത്തരക്കാർക്ക്​ വലിയ രീതിയിൽ ഉപകാരപ്പെടുമെന്ന്​ ആ​രോഗ്യരംഗത്തെ വിദഗ്​ധർ അഭിപ്രായപ്പെടുന്നു.

നിലവിൽ കോവിഡ്​ മഹാമാരിയിലൂടെ ലോകം കടന്നുപോകുന്ന സാഹചര്യത്തിൽ ഇൻഷുറൻസ്​ കവറേജ്​ വിപുലീകരണം സ്വാഗതാർഹമാണെന്ന് ആരോഗ്യ സ്​ഥാപനങ്ങളും പറയുന്നു. വീട്ടുജോലിക്കാർ, സലൂൺ തൊഴിലാളികൾ തുടങ്ങിയ സാധാരണക്കാരാണ്​ അടിസ്​ഥാന ആരോഗ്യ ഇൻഷുറൻസ്​ പദ്ധതിയിൽ ഉൾപ്പെടുന്നത്​.

ഇൻഷുറൻസ്​ പദ്ധതി അംഗീകാരം ലഭിച്ചതോടെ ആയുർവേദ, ഹോമിയോപ്പതി​ ചികിത്സക്ക്​ കൂടുതൽ പേർ സന്നദ്ധരാകുമെന്ന്​ മേഖലയിലെ ഡോക്​ടർമാർ അഭിപ്രായപ്പെട്ടു. ലൈസൻസുള്ള ആയുവേദ ഡോക്​ടർമാർ നിർദേശിക്കുന്ന ചികിത്സക്കാണ്​ ഇൻഷുറൻസ്​ ലഭിക്കുക.

ബദൽ ചികിത്സാ രീതികളിലൊന്നായ ആയുർവേദം സമ്പന്നർക്ക്​ മാത്രം പ്രാപ്യമായിരുന്ന സാഹചര്യം മാറുന്നതോടെ മേഖലയിൽ ജോലി ചെയ്യുന്നവർക്കും ഗുണകരമാകുമെന്ന്​ ഈ രംഗത്തുള്ളവർ വിലയിരുത്തുന്നു.

ഹോമിയോപ്പതിയോട്​ പലരും സൂക്ഷിച്ച അകലം ഉപേക്ഷിക്കാനും ലോകത്തെ ചെലവ്​ കുറഞ്ഞ ചികിത്സാ രീതികളിലൊന്ന്​ സാധാരണക്കാർക്ക് കൂടുതൽ ലഭ്യമാകാനും തീരുമാനം ഉപകരിക്കുമെന്ന്​ ഈ രംഗത്തെ വിദഗ്​ധരും പറയുന്നു.

കോവിഡ്​ കാലത്ത്​ മനോരോഗ ചികിത്സ തേടുന്നവർ വർധിച്ചിട്ടുണ്ട്​. ഒാരോ വ്യക്​തിയും പലതരം മാനസിക വ്യതിയാനങ്ങളിലൂടെ കോവിഡ്​ കാലത്ത്​ കടന്നുപോയിട്ടുണ്ടാകുമെന്നാണ്​ ഈ രംഗത്തെ പ്രമുഖർ അഭിപ്രായപ്പെടുന്നത്​.

അതിനാൽ ഭാവിയിൽ ഈ ചികിത്സക്ക്​ രോഗികൾ വർധിക്കാനാണ്​ സാധ്യത.ഇത്​ മുന്നിൽക്കണ്ടുകൂടിയാണ്​ മനോരോഗ ചികിത്സ കൂടി ഇൻഷുറൻസ്​ പരിധിയിൽ ഉൾപ്പെടുത്തിയതെന്നാണ്​ വിലയിരുത്തൽ​.​