ഹത്തയിൽ വൻ ടൂറിസം പദ്ധതി

504 കി.മീറ്റർ നീളത്തിൽ ചെയർലിഫ്​റ്റ്​ അടക്കമുള്ള സൗകര്യങ്ങളൊരുക്കും

ദുബൈ: ഹത്തയിൽ ആറ്​ വമ്പിച്ച ടൂറിസം വികസന പദ്ധതികൾക്ക്​ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം അംഗീകാരം നൽകി. ഹത്ത വികസന പദ്ധതിയുടെ ഭാഗമായാണ്​ ടൂറിസം മുന്നേറ്റത്തിന്​ പുതിയ പദ്ധതികൾ ആവിഷ്​കരിച്ചത്​. 504 കി.മീറ്റർ നീളത്തിൽ ചെയർലിഫ്​റ്റ്​, എമിറേറ്റിലെ ഏറ്റവും ഉയർന്ന കൊടുമുടിയിലേക്കുള്ള കാൽനടയാത്ര (ജബൽ ഉമ്മുൽ നിസൂർ, 1,300 മീറ്റർ ഉയരം), ഹത്ത സുസ്​ഥിര വെള്ളച്ചാട്ടം, ലോകോത്തര നിലവാരമുള്ള ഹോട്ടൽ എന്നിവയാണ്​ പദ്ധതിയുടെ ഭാഗമായി പ്രധാനമായും നിർമിക്കുന്നത്​. ജില്ലയിലെ ആഭ്യന്തര ടൂറിസത്തെ സഹായിക്കുന്നതിനായി ഹത്ത നിവാസികൾക്ക് 200 അവധിക്കാല ഭവനങ്ങൾ നിർമിക്കാനും അനുമതി നൽകും.

ദുബൈ ഇലക്ട്രിസിറ്റി ആൻഡ് വാട്ടർ അതോറിറ്റിയുടെ പുതിയ പദ്ധതികൾ ഹത്തയിലെ യുവാക്കൾക്ക് 500 തൊഴിലവസരങ്ങൾ നൽകുമെന്ന്​ പദ്ധതി പ്രഖ്യാപിച്ച്​ ശൈഖ്​ മുഹമ്മദ്​ ട്വിറ്ററിൽ കുറിച്ചു. 2016ലാണ്​ ഹത്തയിൽ വികസന പദ്ധതി ആരംഭിക്കുന്നത്​.

2020ൽ ടൂറിസ്​റ്റുകൾ 60,000ൽനിന്ന് പത്ത്​ ലക്ഷമായി വർധിച്ചു. പുതിയ അവധിക്കാല ഭവനങ്ങൾ മേഖലയിലെ ജനങ്ങൾക്ക് 100 ദശലക്ഷം ദിർഹത്തി​െൻറ വാർഷിക വരുമാനമുണ്ടാക്കും. നമ്മുടെ എല്ലാ പദ്ധതികളും പൗരന്മാരുടെ മാന്യമായ ജീവിതം ലക്ഷ്യമാക്കിയുള്ളതാണ്​ -അദ്ദേഹം ട്വീറ്റിൽ തുടർന്നു.

മേഖലയിലെ ചെറിയ നഗരങ്ങൾക്ക് ഹത്ത മാതൃകയാണെന്നും വ്യത്യസ്​ത ജീവിത ശൈലി കാരണമായി ചുരുങ്ങിയ സമയത്തിനുള്ളിൽ എമിറേറ്റിലെ ഏറ്റവും പ്രധാനപ്പെട്ട വിനോദസഞ്ചാര കേന്ദ്രങ്ങളിലൊന്നായി ഇവിടം മാറിയെന്നും ശൈഖ്​ മുഹമ്മദ്​ കൂട്ടിച്ചേർത്തു.

ദുബൈ നഗരത്തിന്​ പുറത്ത്​ ഏറ്റവും സന്ദർശകരെ ആകർഷിക്കുന്ന വിനോദസഞ്ചാര കേന്ദ്രമാണ്​ ഹത്ത. കഴിഞ്ഞ ആഴ്​ചകളിലെ അവധിദിനങ്ങളിൽ നിരവധിപേർ ഇവിടെ സന്ദർശിക്കാനെത്തി. ഹത്ത ഹെറിറ്റേജ്​ വില്ലേജ്​, ഡാം എന്നിവയാണ്​ ഇവിടുത്തെ പ്രധാന ആകർഷണം.