അബൂദബിയിൽ ബൂസ്​റ്റർ ഡോസ്​ നിർബന്ധം

ദുബൈ: വാക്​സിൻ രണ്ടാം ഡോസ്​ സ്വീകരിച്ച്​ ആറുമാസം കഴിഞ്ഞവർ ബൂസ്​റ്റർ ഡോസെടുക്കൽ അബൂദബിയിൽ നിർബന്ധം. ഇല്ലെങ്കിൽ അൽഹുസ്​ൻ ആപിൽ 'പച്ച' തെളിയില്ല. അടുത്ത വെള്ളിയാഴ്​ച മുതൽ എമിറേറ്റിൽ പൊതുസ്ഥലങ്ങളിൽ പ്രവേശിക്കാൻ ഗ്രീൻപാസ്​ നിലവിൽ വരാനിരിക്കെയാണ്​ അബൂദബി ദുരന്തനിവാരണ സമിതി ബൂസ്​റ്റർ ഡോസെടുക്കാൻ നിർദേശിച്ചത്​. രണ്ടാം ഡോസ്​ സ്വീകരിച്ച്​ ആറുമാസം പിന്നിട്ടവർക്ക്​ ബൂസ്​റ്റർ സ്വീകരിക്കാൻ 30 ദിവസം ഗ്രേസ്​ പീരിയഡായി അനുവദിക്കും. എന്നാൽ, സെപ്​റ്റംബർ 20നു​ മുമ്പ്​ ബൂസ്​റ്റർ വാക്​സിൻ സ്വീകരിച്ചില്ലെങ്കിൽ അൽ ഹുസ്​നിൽ സ്​റ്റാറ്റസ്​ 'ഗ്രേ'യാകും. വാക്​സിൻ പരീക്ഷണത്തി​െൻറ ഭാഗമായവർക്ക്​ ഇതിൽ ഇളവനുവദിക്കും.

ആഗസ്​റ്റ്​ 20 മുതൽ പൊതുയിടങ്ങളിൽ ഗ്രീൻപാസ്​ നിർബന്ധമാണെന്ന്​ ജൂലൈയിലാണ്​ അധിക​ൃതർ പ്രഖ്യാപിച്ചത്​. ഷോപ്പിങ്​ സെൻററുകൾ, റസ്​റ്റാറൻറുകൾ, കഫേകൾ, മറ്റു ചെറുകിട ഔട്ട്​ലെറ്റുകൾ, ജിമ്മുകൾ, വിനോദ ​സൗകര്യങ്ങൾ, കായികകേന്ദ്രങ്ങൾ, ഹെൽത്ത്​ ഹബുകൾ, റിസോർട്ടുകൾ, മ്യൂസിയങ്ങൾ, സാംസ്​കാരിക കേന്ദ്രങ്ങൾ, തീം പാർക്കുകൾ എന്നിവിടങ്ങളിൽ നിബന്ധന ബാധകമാണ്​. ഈ പട്ടികയിൽ സർവകലാശാലകൾ, സ്ഥാപനങ്ങൾ, പൊതു-സ്വകാര്യ സ്​കൂളുകൾ, നഴ്​സറികൾ എന്നിവയും ഉൾപ്പെടുത്തിയിട്ടുണ്ട്​.

വാക്​സിൻ സ്വീകരിക്കുകയും പി.സി.ആർ പരിശോധനയിൽ നെഗറ്റിവ്​ ആവുകയും ചെയ്​താൽ​ 30 ദിവസം വരെ അൽ ഹുസ്​ൻ ആപിൽ ഗ്രീൻ പാസ്​ തെളിയും. കുത്തിവെപ്പെടുക്കുന്നതിൽ ഇളവുള്ളവർക്ക്​ പി.സി.ആർ പരിശോധന നെഗറ്റിവായി ഏഴുദിവസം വരെ 'പച്ച' തെളിയും. 16 വയസ്സിൽ താഴെയുള്ള കുട്ടികൾക്ക്​ എപ്പോഴും ഗ്രീൻ സ്​റ്റാറ്റസ്​ ആയിരിക്കും. പി.സി.ആർ പരിശോധനയും ആവശ്യമില്ല. പുതിയ റെസിഡൻറ്​സ്​ പെർമിറ്റ്​ എടുത്തവർക്ക്​ വാക്​സിൻ സ്വീകരിക്കാൻ 60 ദിവസത്തെ ​ഗ്രേസ്​ പീരിയഡ്​ അനുവദിക്കുമെന്നും അധികൃതർ അറിയിച്ചിട്ടുണ്ട്​.