ഫുജൈറയിൽ കാർഗോ തട്ടിപ്പ്​; പണവും സാധനങ്ങളുമായി മലയാളി ഉടമകൾ മുങ്ങി

ഫുജൈറ: നാട്ടിലേക്കയക്കാൻ പ്രവാസികൾ നൽകിയ വിലപിടിപ്പിള്ള വസ്തുക്കളും ലക്ഷക്കണക്കിന്​ രൂപയുമായി ഉടമകൾ നാട്ടിലേക്ക്​ മുങ്ങിയതായി പരാതി. ഫുജൈറ ദിബ്ബയിൽ പ്രവർത്തിച്ചിരുന്ന എ.എം.ടി കാർഗോ എന്ന സ്ഥാപനത്തിന്‍റെ ഉടമകളാണ്​ മുങ്ങിയത്​. ഉടമകളായ കോഴിക്കോട്​ പയ്യോളി സ്വദേശി അർഷദ്​, തൃശൂർ സ്വദേശി ബാബു എന്നിവർക്കെതിരെ ഉപഭോക്​താക്കൾ യു.എ.ഇയിലും കേരളത്തിലും പരാതി നൽകി.

ഇവർ നടത്തിയിരുന്ന സ്ഥാപനത്തിൽ നൂറുകണക്കിന്​ ​കാർഗോ ബോക്സുകളാണ്​ കെട്ടിക്കിടക്കുന്നത്​. ഇതിലെ വിലപ്പെട്ട സാധനങ്ങൾ എടുത്തശേഷമാണ്​ ഇവർ മുങ്ങിയതെന്ന്​ പരാതിക്കാർ പറയുന്നു. പ്രവാസികൾ പ്രതീക്ഷയോടെ നാട്ടിലേക്ക്​ അയക്കാൻ ഏൽപിച്ച നിരവധി സാധനങ്ങളാണ്​ ഇവിടെക്കിടന്ന്​ നശിക്കുന്നത്​. ഇവർ മുങ്ങിയതോടെ സ്​പോൺസറായ യു.എ.ഇ പൗരൻ ഈ സാധനങ്ങളെല്ലാം മറ്റൊരു ഫാമിലേക്ക്​ മാറ്റിയിട്ടുണ്ട്​. ബില്ലുമായി എത്തുന്നവർക്ക്​ ഈ സാധനങ്ങൾ തിരി​കെ നൽകാൻ സ്​പോൺസർ ഒരാളെ ചുമതലപ്പെടുത്തിയിട്ടുണ്ട്​. ഈ സ്ഥാപനം വഴി കാർഗോ അയച്ചവർ ബില്ലുമായി ഇവിടെ നേരിട്ട്​ എത്തിയാൽ ഇവിടെയുള്ള സാധനങ്ങൾ തിരികെ നൽകുന്നുണ്ട്​. കാർഗോ തുകയായി ഉപഭോക്​താക്കൾ അയച്ച ലക്ഷക്കണക്കിന്​ രൂപയുമായാണ്​ ഇവർ മുങ്ങിയിരിക്കുന്നത്​. ഉപഭോക്​താക്കൾക്കുപുറമെ കാർഗോയുമായി ബന്ധപ്പെട്ട മറ്റ്​ ഇടപാടുകാർക്കും ഇവർ പണം നൽകാനുണ്ട്​. ഇവരുടെ നമ്പർ സ്വിച്ച്​ ഓഫ്​ചെയ്ത നിലയിലാണ്​. 2019 വരെ സജീവമായിരുന്ന ഈ കമ്പനിയുടെ ​സമൂഹമാധ്യമ പേജുകൾ നിലവിൽ നിർജീവമായ നിലയിലാണ്​. മലയാളികൾക്കുപുറമെ ഇന്ത്യയിലെ മറ്റു​ സംസ്ഥാനങ്ങളിൽനിന്നുള്ള നിരവധി പേരും ഇവരുടെ തട്ടിപ്പിന്​ ഇരയായി. ഇവർ യു.എ.ഇ ആഭ്യന്തരമന്ത്രാലയത്തിൽ പരാതി നൽകിയിട്ടുണ്ട്​. മലയാളികൾ കേരള മുഖ്യമന്ത്രി പിണറായി വിജയനും ഡി.ജി.പിക്കും പരാതി നൽകിയിട്ടുണ്ട്​.