കഞ്ചാവ്​ കൈവശംവെച്ച കേസ്; പിടിയിലായ യാത്രക്കാരനെ കുറ്റവിമുക്തനാക്കി

ദുബൈ: വിമാനത്താവളത്തിൽ കഞ്ചാവ് കലർത്തിയ ഉൽപന്നവുമായി പിടിക്കപ്പെട്ടയാളെ കുറ്റവിമുക്തനാക്കി ദുബൈ കോടതി. 2024 മാർച്ച് മൂന്നിനാണ്​ ദുബൈ അന്താരാഷ്​ട്ര വിമാനത്താവളം ടെർമിനൽ 3ൽ വെച്ച് സിറിയൻ പൗരൻ പിടിയിലായത്​. കസ്റ്റംസ് ഉദ്യോഗസ്ഥർ എക്‌സ്റേ സ്‌ക്രീനിങ്ങിൽ ലഗേജിൽ സംശയകരമായ വസ്തു കണ്ടെത്തിയതിനെത്തുടർന്നാണ്​ ഇയാളെ പിടികൂടിയത്​. പരിശോധനയിൽ നിരവധി ഇ-സിഗരറ്റുകളും കഞ്ചാവിന്‍റെ അംശമടങ്ങിയ ഫിൽറ്ററുകളും കണ്ടെത്തുകയായിരുന്നു. ഇയാളെ പൊലീസ്​ കസ്റ്റഡിയിലെടുക്കുകയും അതേദിവസം ജാമ്യത്തിൽ വിടുകയും ചെയ്തു. എന്നാൽ​, മൂത്ര പരിശോധനയിൽ കഞ്ചാവിലെ സൈക്കോ ആക്ടിവ് ഘടകത്തിന്‍റെ സാന്നിധ്യം സ്ഥിരീകരിച്ചതിനെത്തുടർന്ന് ഏപ്രിൽ അഞ്ചിന് ഇയാളെ കസ്റ്റഡിയിലെടുത്തു. പിന്നീട്​ കഞ്ചാവ് കൈവശം വെച്ചതിനും ഉപയോഗിച്ചതിനും പ്രോസിക്യൂട്ടർ ഇയാളെ ദുബൈ ക്രിമിനൽ കോടതിയിലേക്ക് റഫർ ചെയ്തു.

എന്നാൽ, പിടിച്ചെടുത്ത ഉൽപന്നങ്ങൾ മയക്കുമരുന്ന് കണ്ടെത്തിയ വ്യക്തികൾക്ക് നിയമപരമായ ഇളവുകൾ നൽകുന്ന 2021ലെ ഫെഡറൽ നിയമത്തിന്‍റെ പരിധിയിൽ വരുന്നതാണെന്ന്​ കോടതി നിർണയിക്കുകയായിരുന്നു. ഇ-സിഗരറ്റുകളിൽ അടങ്ങിയ വസ്തുക്കളെക്കുറിച്ച് അറിവില്ലാതെ ആതൻസിൽ വെച്ച്​ നിയമപരമായി വാങ്ങിയതാണ്​ ഇവയെന്ന്​ പിടിയിലായയാൾ വിചാരണക്കിടെ മൊഴി നൽകുകയും ചെയ്തു. വ്യക്തിഗത ഉപയോഗത്തിനുവേണ്ടി മാത്രമാണെന്നും ഇയാൾ വ്യക്തമാക്കിയിരുന്നു. ഹാജരാക്കിയ തെളിവുകൾ ശിക്ഷാവിധിക്ക് ആവശ്യമായ നിലവാരം പുലർത്തുന്നില്ലെന്ന്​ കോടതി വിലയിരുത്തുകയും, തുടർന്ന്​ സംശയാതീതമായി കുറ്റം തെളിയിക്കപ്പെടുന്നതുവരെ ഓരോ പ്രതിയും നിരപരാധിയാണെന്ന് കരുതുന്ന ഭരണഘടനാ തത്ത്വം ഉയർത്തിക്കാട്ടിക്കൊണ്ടാണ്​ കോടതി വിധി പ്രസ്താവിച്ചത്​. അതേസമയം, മയക്കുമരുന്ന്​ കൈവശം വെച്ച കുറ്റങ്ങളിൽനിന്ന് മുക്തമാക്കിയെങ്കിലും, മയക്കുമരുന്ന് ഉപയോഗിച്ച കുറ്റം മിസ്‌ഡിമെനേഴ്സ് കോടതിയിലേക്ക് റഫർ ചെയ്തതായി ‘ഖലീജ്​ ടൈംസ്​’ റിപ്പോർട്ട്​ ചെയ്തു.