സി.ബി.എസ്.ഇ : മൂല്യനിർണയം സ്വാഗതാർഹം, ഫലം വൈകുന്നത്​ ആശങ്കജനകം

ദുബൈ: സി.ബി.എസ്​.ഇ മൂല്യനിർണയത്തിന്​ മൂന്ന്​ ക്ലാസുകളിലെ മാർക്കുകൾ മാനദണ്ഡമാക്കിയ നടപടി സ്വാഗതാർഹമെന്ന്​ പ്രവാസ ലോകത്തെ രക്ഷിതാക്കളും അധ്യാപകരും വിദ്യാർഥികളും. എന്നാൽ, ജൂലൈ 31 വരെ ഫലപ്രഖ്യാപനം വൈകുന്നത്​ ആശങ്കാജനകമാണെന്നും അവർ പറയുന്നു.

വിദേശ സർവകലാശാലകളിൽ പുതിയ അധ്യയന വർഷം തുടങ്ങിക്കഴിഞ്ഞു. പലയിടത്തും വൈകാതെ തന്നെ ക്ലാസുകൾ തുടങ്ങും. ഫലം വരാതെ തന്നെ ചില സ്​ഥലങ്ങളിൽ കുട്ടികൾക്ക്​ ​പ്രവേശനം അനുവദിച്ചിരുന്നു.

ഉടൻ മാർക്ക്​ ലിസ്​റ്റ്​ സമർപ്പിക്കാമെന്ന വാക്കി​െൻറ അടിസ്​ഥാനത്തിലാണ്​ പ്രവേശനം നൽകിയത്​. എന്നാൽ, ഫലം ഇനിയും വൈകുന്നത്​ ഇവരെ പ്രതിസന്ധിയിലാക്കും. ഈ തീരുമാനം നേരത്തേ എടുക്കാമായിരുന്നുവെന്നും ഫലപ്രഖ്യാപനം ഈ മാസമെങ്കിലും നടത്താമായിരുന്നുവെന്നുമാണ്​ രക്ഷിതാക്കളുടെ അഭിപ്രായം.

തുടർവിദ്യാഭ്യാസം ഇന്ത്യയിൽ നടത്താൻ നിശ്ചയിച്ച വിദ്യാർഥികളെ ഇത്​ ബാധിക്കില്ല. എന്നാൽ, ഗൾഫിൽനിന്ന്​ സി.ബി.എസ്​.ഇ പൂർത്തിയാക്കിയ വിദ്യാർഥികളിൽ നല്ലൊരു ശതമാനവും ഇവിടെ തന്നെയോ മറ്റ്​ വിദേശ രാജ്യങ്ങളിലോ തുടർവിദ്യാഭ്യാസം നടത്തുകയാണ്​ പതിവ്​. അതേസമയം, 30:30:40 അനുപാതം സ്വാഗതാർഹമാണെന്നാണ്​ പൊതുവെ രക്ഷിതാക്കളുടെയും അധ്യാപകരുടെയും വിദ്യാർഥികളുടെയും വിലയിരുത്തൽ.

ഫലപ്രഖ്യാപനം 31ന്​ മുമ്പുണ്ടാകുമെന്നും ഇവർ പ്രതീക്ഷിക്കുന്നു. 10ാം ക്ലാസിലെ ഫൈനൽ പരീക്ഷ കുട്ടികൾ ഗൗരവമായെടുത്താണ്​ എഴുതിയത്​.

എന്നാൽ, 11ാം ക്ലാസ്​ പരീക്ഷ അത്ര ഗൗരവമാക്കാത്ത വിദ്യാർഥികൾക്ക്​ ആശങ്കയുണ്ട്​. 11ാം ക്ലാസിലെ പരീക്ഷയിലെ മാർക്കുകൾ സാധാരണ രീതിയിൽ മറ്റെവിടെയും പരിഗണിക്കാറില്ല.അതിനാൽ, ഫൈനൽ പരീക്ഷയുടെ അത്ര ഗൗരവത്തോടെയല്ല 11ാം ക്ലാസ്​ പരീക്ഷ എഴുതുന്നത്​.ഇതിൽ ചെറിയൊരു ആശങ്ക വിദ്യാർഥികൾ പങ്കുവെക്കുന്നുണ്ട്​.