സി.ബി.എസ്​.ഇ : ഇന്നലെയും തീരുമാനമില്ല, ആശങ്കയിൽ രക്ഷിതാക്കൾ

സി.ബി.എസ്​.ഇ പരീക്ഷ നടന്നില്ലെങ്കിൽ വിദ്യാർഥികളുടെ പ്രവേശനം അവതാളത്തിലാകും

ദുബൈ: സി.ബി.എസ്​.ഇ 12ാം ക്ലാസ്​ പരീക്ഷയിൽ തീരുമാനമെടുക്കാൻ ഇന്നലെ ചേർന്ന യോഗവും തീരുമാനമാകാതെ പിരിഞ്ഞു. ഇതോടെ വിദ്യാർഥികളുടെയും രക്ഷിതാക്കളുടെയും ആശങ്ക വർധിച്ചു. പരീക്ഷ റദ്ദാക്കി ഫലം പ്രഖ്യാപിക്കു​കയോ ഉടൻ പരീക്ഷ നടത്തുകയോ ചെയ്യും എന്നതായിരുന്നു രക്ഷിതാക്കളുടെ പ്രതീക്ഷ.

തീരുമാനം അനിശ്ചിതമായി നീളുന്നതോടെ പ്രവാസി വിദ്യാർഥികളുടെ തുടർപഠനവും പ്രതിസന്ധിയിലായി.വിദേശ രാജ്യങ്ങളിലെ ഉന്നത വിദ്യാഭ്യാസ കേന്ദ്രങ്ങളിലെ പുതിയ അധ്യയന വർഷം ഉടൻ ആരംഭിക്കും. സി.ബി.എസ്​.ഇ പരീക്ഷ നടന്നില്ലെങ്കിൽ വിദ്യാർഥികളുടെ പ്രവേശനം അവതാളത്തിലാകും. മാർച്ചിലായിരുന്നു പരീക്ഷ നടക്കേണ്ടിയിരുന്നത്​. ഈ മാസമെങ്കിലും പരീക്ഷ നടത്തി ഉടനടി ഫലം പ്രഖ്യാപിച്ചില്ലെങ്കിൽ വിദ്യാർഥികളുടെ ഒരു വർഷം നഷ്​ടപ്പെടുന്ന അവസ്​ഥയിലാണ്​. അല്ലാത്തപക്ഷം, 10ാം ക്ലാസിലേതുപോലെ പരീക്ഷ റദ്ദാക്കണം. മുൻ ടേമിലെ പ്രകടനത്തി​െൻറ അടിസ്​ഥാനത്തിൽ ഫലം പ്രഖ്യാപിക്കുകയും ചെയ്യണം. ഇതാണ്​ രക്ഷിതാക്കളുടെ ആവശ്യം.

ഇന്ത്യക്ക്​ പുറത്ത്​ 22 രാജ്യങ്ങളിൽ സി.ബി.എസ്​.ഇ പരീക്ഷക്ക്​ സെൻററുകളുണ്ട്​. ഇന്ത്യയിൽനിന്ന്​ വ്യത്യസ്​തമായ ചോദ്യപേപ്പറുകളാണ്​ ഇവിടെ ഉപയോഗിക്കുന്നത്​. അതിനാൽ, ഇന്ത്യയിലെ പരീക്ഷ വൈകിയാലും വിദേശരാജ്യങ്ങളിൽ പരീക്ഷ നടത്തണമെന്ന ആവശ്യവും രക്ഷിതാക്കളും സ്​കൂൾ മാനേജ്​മെൻറും മുന്നോട്ടുവെക്കുന്നു. താരതമ്യേന കോവിഡ്​ ബാധിതർ കുറഞ്ഞ വിദേശരാജ്യങ്ങളിൽ ഇതിന്​ തടസ്സമുണ്ടാകില്ല. എസ്​.എസ്​.എൽ.സി, പ്ലസ്​ ടു പരീക്ഷകൾ ഗൾഫിൽ നടത്തിയിരുന്നു.

പരീക്ഷ വൈകുന്നതിനാൽ നാട്ടിലേക്ക്​ മടങ്ങാൻപോലും കഴിയാത്ത അവസ്​ഥയിലാണ്​ വിദ്യാർഥികൾ. പലരുടെയും വിസ കാലാവധി അവസാനിക്കാറായി. കൂടുതൽ കുട്ടികളും തുടർവിദ്യാഭ്യാസം നാട്ടിലാക്കാനാണ്​ തീരുമാനിച്ചിരിക്കുന്നത്​. അതിനാൽ, വിസ കാലാവധി കഴിയുന്നതിനുമുമ്പ്​​ എങ്ങനെയെങ്കിലും കുട്ടികളെ നാട്ടിലെത്തിക്കണമെന്നാണ്​ രക്ഷിതാക്കളുടെ ആഗ്രഹം. പരീക്ഷ വൈകിയാൽ വിസിറ്റിങ്​ വിസ എടുത്ത്​ വീണ്ടും യു.എ.ഇയിൽ തങ്ങേണ്ടി വരും. നിലവിൽ സാമ്പത്തിക ബാധ്യത അനുഭവിക്കുന്ന രക്ഷിതാക്കൾക്ക്​ അധിക ബാധ്യതയായിരിക്കും ഇതുണ്ടാക്കുക.