മുതിർന്നവരുടെ അവജ്​ഞയും മാതാപിതാക്കളുടെ തർക്കവും കുട്ടികളെ തളർത്തുന്നു

ദുബൈ: കുട്ടികളുടെ അവകാശ സംരക്ഷണ ഹോട്ട്​ലൈനിൽ നാലു മാസത്തിനകം രജിസ്​റ്റർ ചെയ്​തത്​ 134 സംഭവങ്ങൾ. മുതിർന്നവരുടെ അവഗണനയും അവജ്​ഞയും, മാനസിക-ശാരീരിക ഉപദ്രവങ്ങൾ എന്നിവയാണ്​ പരാതികളിൽ ഭൂരിഭാഗവുമെന്ന്​ ഷാർജ ചിൽഡ്രെൻ ഹോട്ട്​ലൈൻ ഡയറക്​ടർ അഹ്​മദ്​ അൽ തർതോർ പറഞ്ഞു. 

ശിശു സംരക്ഷണ നിയ​മ പ്രകാരം കുട്ടികൾക്കെതിരായ ഇത്തരം സംഭവങ്ങൾ റി​പ്പോർട്ട്​ ചെയ്യുന്നത്​ നിർബന്ധിതമാണ്​. സാമൂഹിക പ്രവർത്തകർ, അധ്യാപകർ തുടങ്ങി കുട്ടികളുമായി അടുപ്പം പുലർത്തുന്നവരാണ്​ അവരുടെ വിഷമങ്ങളും വേദനിപ്പിക്കപ്പെടുകയോ പീഡിപ്പിക്കപ്പെടുകയോ ചെയ്​തുവെന്ന്​ സം​ശയമുണ്ടെങ്കിൽ അക്കാര്യവും അറിയിക്കേണ്ടത്​. 

പൊതു-സ്വകാര്യ വിദ്യാലയങ്ങളിൽ ഇക്കാര്യം വ്യക്​തമാക്കി വിപുലമായ ബോധവത്​കരണം നടത്തിയതും ഫലം കണ്ടിട്ടുണ്ട്​. കുട്ടികളെയും അധ്യാപകരെയും ജീവനക്കാരെയും നിയമത്തി​​​െൻറ വിശദാംശങ്ങളും പീഡനങ്ങളും ഉപ​ദ്രവങ്ങളും റിപ്പോർട്ട്​ ചെയ്യേണ്ടതി​​​െൻറ ആവശ്യകതയും ബോധ്യപ്പെടുത്തി. 
 കുടുംബത്തിലെ പ്രശ്​നങ്ങളാണ്​ കുട്ടികളെ അലട്ടുന്ന മറ്റൊരു വിഷമം. ഒരു പെൺകുട്ടി ക്ലാസുകൾ കട്ടു ചെയ്യുന്നതും മാർക്ക്​ കുറയുന്നതും ശ്രദ്ധയിൽപ്പെട്ട്​ അന്വേഷിച്ചപ്പോൾ മാതാപിതാക്കൾ പിണങ്ങിക്കഴിയുകയാണ്​ എന്ന്​ വ്യക്​തമായി. തുടർന്ന്​ മാതാപിതാക്കളുമായി ചർച്ച ചെയ്​ത്​ അവർക്കിടയിൽ ​ഒരുമ വളർത്തിയതോടെ കുട്ടിയുടെ വിഷമങ്ങൾ മാറി, ക്ലാസിൽ കൂടുതൽ ശ്രദ്ധയും മാർക്കും ലഭിക്കാനും തുടങ്ങി.  

തങ്ങൾക്കിടയിലെ പ്രശ്​നങ്ങൾ മക്കളിൽ വലിയ ആഘാതങ്ങൾ സൃഷ്​ടിക്കുമെന്ന കാര്യം മാതാപിതാക്കളുടെ ഒാർമയിൽ വേണമെന്ന്​ അൽ തർതോർ പറഞ്ഞു. 
സ്​കൂളിലെ മുതിർന്നവരും സഹപാഠികളും കാണിക്കുന്ന മുഷ്​ക്കാണ്​ മറ്റൊരു പ്രശ്​നം. ഇത്തരം 37 സംഭവങ്ങൾ റി​േപ്പാർട്ട്​ ചെയ്​തിട്ടുണ്ട്​.  24 മണിക്കൂറും പ്രവർത്തിക്കുന്ന ഹോട്ട്​ലൈനിൽ 800 700 നമ്പറിൽ ബന്ധപ്പെടാം