വളരാൻ ഇവിടം തിരഞ്ഞെടുക്കൂ​

ദുബൈ: ലോകത്താകമാനമുള്ള നിക്ഷേപകരെയും പ്രതിഭകളെയും യു.എ.ഇയിലേക്ക്​ സ്വാഗതംചെയ്യുന്ന കാമ്പയിൻ ആരംഭിച്ച്​ രാഷ്​ട്രനേതാക്കൾ. 'യുനൈറ്റഡ്​ ഗ്ലോബൽ എമിറേറ്റ്​സ്' തലക്കെട്ടിനു കീഴിൽ നടക്കുന്ന കാമ്പയിൻ ലക്ഷ്യമിടുന്നത്​ ലോകത്തെ 190 രാജ്യങ്ങളിൽ നിന്നുള്ളവർക്കും വളരാനും വികസിക്കാനും യു.എ.ഇയിലൂടെ സാധിക്കുമെന്ന്​ പ്രചരിപ്പിക്കലാണ്​.

ആഗോളതലത്തിൽ സംരംഭകരെ സഹായിക്കാൻ യു.എ.ഇ വാഗ്​ദാനം ചെയ്യുന്ന ആനുകൂല്യങ്ങളും പ്രോത്സാഹനവും ഉയർത്തിക്കാണിക്കുന്ന അന്താരാഷ്​ട്രതലത്തിലുള്ള പ്രചാരണമായിരിക്കും ഇതെന്ന്​ യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം കാമ്പയിൻ പ്രഖ്യാപിച്ച്​ ട്വിറ്ററിൽ കുറിച്ചു.

ഞങ്ങളുടെ വേരുകൾ അറബാണ്​, എന്നാൽ ഞങ്ങളുടെ അഭിലാഷങ്ങൾ ആഗോളമാണ്​. തങ്ങളുടെ ആശയങ്ങൾ യാഥാർഥ്യമാക്കാൻ ലോകമെമ്പാടുമുള്ള പ്രതിഭകളെ ക്ഷണിക്കുന്നു -അദ്ദേഹം കൂട്ടിച്ചേർത്തു. അബൂദബി കിരീടാവകാശിയും യു.എ.ഇ സായുധ സേനയുടെ ഡെപ്യൂട്ടി സുപ്രീം കമാൻഡറുമായ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാനും വിശാലമായ കാമ്പയിൻ ട്വിറ്ററിലൂടെ പ്രഖ്യാപിച്ചു. അടുത്ത 50 വർഷത്തിനിടയിൽ ഏറ്റവും ശക്തമായ ആഗോള സാമ്പദ്​ വ്യവസ്​ഥകളിലൊന്നാവുക എന്നതാണ് പുതിയ പ്രചാരണത്തി​െൻറ ലക്ഷ്യമെന്ന്​ അദ്ദേഹം ട്വീറ്റിൽ പറഞ്ഞു. പ്രതിഭകൾ, വിദഗ്​ധർ, നിക്ഷേപം എന്നിവയുടെ​ പ്രധാന ലക്ഷ്യസ്ഥാനമെന്ന പദവി ശക്തിപ്പെടുത്തുന്നതിനായി രാഷ്​ട്രം നേട്ടങ്ങൾ കെട്ടിപ്പടുക്കുമെന്നും അദ്ദേഹം കൂട്ടിച്ചേർത്തു.

കാമ്പയിൻ പ്രഖ്യാപിച്ച്​ പുറത്തിറക്കിയ വിഡിയോയിൽ ഇമാറാത്തിനെ 'അവസരങ്ങളുടെ ഭൂമി' എന്ന്​ വിശേഷിപ്പിക്കുന്നുണ്ട്​. രാജ്യത്തി​െൻറ ബഹിരാകാശ നേട്ടങ്ങളും ​ചൊവ്വാദൗത്യവും ഇതിൽ പരാമർശിക്കുന്നുണ്ട്​. ആദായനികുതിരഹിത ആനുകൂല്യങ്ങളും മറ്റു രാജ്യം വാഗ്​ദാനം ചെയ്യുന്ന അനുകൂല തൊഴിൽ സാഹചര്യങ്ങളും ഇതിൽ പ്രത്യേകം പരാമർശിച്ചിട്ടുണ്ട്​.

രാജ്യം സുവർണ ജൂബിലി ആഘോഷിക്കുന്ന സന്ദർഭത്തിൽ അടുത്ത അമ്പത്​ വർഷത്തെ മുന്നോട്ടു നയിക്കുന്ന തത്ത്വങ്ങൾ കഴിഞ്ഞ ദിവസം നേതാക്കൾ വെളിപ്പെടുത്തിയിരുന്നു. നിക്ഷേപത്തിനും പ്രതിഭകൾക്കും യോജിച്ച സാഹചര്യം സൃഷ്​ടിക്കൽ ഇതിൽ പ്രധാനപ്പെട്ടതാണ്​. ആഗോളതലത്തിലെ സാമ്പത്തിക പ്രവർത്തനങ്ങളുടെ കേന്ദ്രമാവുക എന്ന ലക്ഷ്യത്തിലേക്ക്​ മുന്നേറുന്നതിനാണ്​ പദ്ധതികൾ ലക്ഷ്യംവെക്കുന്നത്​.