ആഗോള ഗ്രാമത്തിൽ ക്രിസ്തുമസ്​ ആഘോഷം തുടങ്ങി; 22 ദിവസം നീളുന്ന പരിപാടികൾ

ദുബൈ: സന്ദർശകരുടെ പ്രധാന ആകർഷണങ്ങളിൽ ഒന്നായ ദുബൈ ഗ്ലോബൽ വില്ലേജിൽ ക്രിസ്തുമസ്​ ആഘോഷങ്ങൾക്ക് തുടക്കമായി. 22 ദിവസം നീളുന്ന വിവിധ പരിപാടികൾക്ക് ഇനി ആഗോള ഗ്രാമം സാക്ഷിയാവും. ലോകത്തിന്‍റെ വിവിധ ഭാഗങ്ങളിൽ നിന്നുള്ളവർ തിരുപ്പിറവി ആഘോഷിക്കാൻ ഗ്ലോബൽ വില്ലേജിലേക്ക് ഒഴുകിയെത്തും.

21 അടി ഉയരമുള്ള ക്രിസ്തുമസ്​ ട്രീയിൽ ദീപങ്ങൾ തെളിച്ചായിരുന്നു ദുബൈ ഗ്ലോബൽ വില്ലേജിലെ ആഘോഷം. കടലാസ് കഷണങ്ങൾ കൊണ്ട് ആകാശത്ത് നിന്ന് പെയ്യിക്കുന്ന മഞ്ഞ്​, ചുവട് വെച്ച് എത്തുന്ന ഹിമക്കരടികൾ, കാഴ്ചക്കാരെ അഭിവാദ്യം ചെയ്യാൻ നൃത്തസംഘത്തിനൊപ്പമെത്തുന്ന ക്രിസ്തുമസ്​ പാപ്പ തുടങ്ങി രസികൻ കാഴ്ചകളൊരുക്കിയാണ് ദുബൈ ഗ്ലോബൽ വില്ലേജിലെ ക്രിസ്തുമസ്​ ആഘോഷം.

ഇനിയുള്ള ഓരോ രാത്രിയിലും അഞ്ച് തവണ ഈ വേദിയിൽ ക്രിസ്തുമസ്​ പാപ്പയും സംഘവും ആഘോഷവുമായി എത്തും. 22 ദിവസം നീളുന്ന ആഘോഷങ്ങളാണ് ക്രിസ്മസിന്‍റെ ഭാഗമായി ദുബൈ ഗ്ലോബൽ വില്ലേജിൽ ഒരുക്കിയിരിക്കുന്നത്. ജനുവരി അഞ്ച് വരെ മുടക്കമില്ലാതെ ഈ വേദിയിൽ ക്രിസ്തുമസ്​ ആഘോഷം തുടരും.