ഷാർജയിൽ വരുന്നു; അതിവേഗ സ്കൈപോഡ് ഗതാഗതം

ഷാർജ: അതിവേഗ സ്കൈപോഡ് ഗതാഗത സംവിധാനം സ്​ഥാപിക്കുന്ന ആദ്യത്തെ നഗരമാകാൻ ഷാർജയുടെ പദ്ധതി.എമിറേറ്റിലെ യാത്രക്കാരുടെയും കാർഗോയുടെയും സഞ്ചാരത്തിനാണ്​ സ്​റ്റീൽ ചരടിൽ ബന്ധിപ്പിച്ച തൂങ്ങിക്കിടക്കുന്ന ഡ്രൈവറില്ലാ വാഹനം ഉപയോഗിക്കാൻ ആലോചിക്കുന്നത്​.

ഷാർജ റിസർച്​ ടെക്​നോളജി ആൻഡ്​ ഇന്നൊവേഷൻ പാർക്കാണ്​ പദ്ധതിയുടെ ആദ്യഘട്ട പരീക്ഷണം നടത്തിയത്​. പരമ്പരാഗത കേബി​ൾ കാർ, ട്രാമുകളിൽനിന്ന്​ വ്യത്യസ്​തമായി ഇത്​​​ സ്വതന്ത്രമായി മുന്നോട്ടും പിന്നോട്ടും സഞ്ചരിക്കും. നിലവിൽ 400 മീറ്റർ നീളത്തിൽ പരീക്ഷിച്ച സ്​കൈപോഡ്​ മണിക്കൂറിൽ 50 കിലോമീറ്റർ വരെ വേഗതയിൽ സഞ്ചരിച്ചു. ഇവ നാല് യാത്രക്കാരെയാണ്​ വഹിക്കുന്നത്​.

യുകാർ എന്നാണ്​ യാത്രക്കാരെ വഹിക്കുന്ന സ്​കൈപോഡുകൾ അറിയപ്പെടുന്നത്​. ഈ വർഷം ഒക്​ടോബർ, നവംബർ മാസത്തോടെ 2.4 കിലോമീറ്റർ നീളത്തിൽ ട്രാക്ക്​ സ്​ഥാപിക്കുകയും മണിക്കൂറിൽ 150 കിലോമീറ്റർ വേഗതയിലുള്ള സംവിധാനം പരീക്ഷിക്കുകയും ചെയ്യും.

പദ്ധതി വാണിജ്യവത്ക​രിക്കാനും മേഖലയിലെ ഏറ്റവും വലിയ വിജയങ്ങളിലൊന്നാക്കി ഇതിനെ മാറ്റാനുമാണ്​ ആഗ്രഹിക്കുന്നതെന്ന്​ ഷാർജ റിസർച്​ ടെക്​നോളജി ആൻഡ്​ ഇന്നൊവേഷൻ പാർക്ക്​​ സി.ഇ.ഒ ഹുസൈൻ അൽ മഹ്​മൂദി പറഞ്ഞു. ഷാർജയെ സുസ്​ഥിരമായ ഭാവി പട്ടണമാക്കി മാറ്റിയെടുക്കലാണ്​ തങ്ങളുടെ ലക്ഷ്യമെന്നും അദ്ദേഹം പറഞ്ഞു.

ഗതാഗതക്കുരുക്ക്​ സൃഷ്​ടിക്കുന്ന വെല്ലുവിളികൾ നമുക്കറിയാം. ഈ പദ്ധതി ഷാർജയുടെയും മുഴുവൻ യു.എ.ഇയുടെയും സഞ്ചാര സൗകര്യവും മറ്റും വർധിപ്പിക്കുമെന്ന് ഞങ്ങൾ വിശ്വസിക്കുന്നു. കാരണം ഇത് കുറച്ച് ഭൂമി ഉപയോഗിക്കുകയും എന്നാൽ, കൂടുതൽ കാര്യക്ഷമമായി പ്രവർത്തിക്കുകയും ചെയ്യും -അദ്ദേഹം വ്യക്​തമാക്കി.

െട്രയിൻ സർവിസുകളുമായി ഇതിനെ ബന്ധിപ്പിക്കാനും സാധിക്കും. അതുപോലെ 16 യാത്രക്കാരെ വരെ വഹിക്കുന്ന ബസുകളും ഇതിൽ ഉപയോഗിക്കാൻ കഴിയും. 30 ടൺ കാർഗോ വഹിക്കാനുള്ള ശേഷിയും ഇതിനുണ്ടാകും.

വിവിധങ്ങളായ പുതിയ സഞ്ചാരസാധ്യതകൾ വേറെയും ഷാർജ റിസർച്​ ടെക്​നോളജി ആൻഡ്​ ഇന്നൊവേഷൻ പാർക്ക്​ പരീക്ഷിക്കുന്നുണ്ട്​. 20 യാത്രക്കാരെ വരെ വഹിക്കുന്ന ഡ്രൈവറില്ലാത്ത ബസുകൾ ഇതിൽ പ്രധാനമാണ്​.ഏറ്റവും പുതിയ സാ​ങ്കേതിക വിദ്യകളുപയോഗിച്ച്​ സഞ്ചരിക്കുന്ന ഇത്തരം സംവിധാനങ്ങളും പരീക്ഷണഘട്ടത്തിലാണ്​.