കമോൺ കേരളക്ക്​ നാളെ തുടക്കം

ഷാർജ: മിഡ്​ൽ ഈസ്റ്റിലെ ഏറ്റവും വലിയ ഇന്ത്യൻ വാണിജ്യ, വിനോദ, സാംസ്കാരിക മേളയായ 'ഗൾഫ്​ മാധ്യമം കമോൺ കേരള' നാലാം എഡിഷന്​​ ഷാർജ എക്സ്​പോ സെന്‍ററിൽ വെള്ളിയാഴ്ച​ കൊടിയേറ്റം. ഷാർജ ചേംബർ ഓഫ്​ കോമേഴസ്​ ആൻഡ്​ ഇൻഡസ്​ട്രീസിന്‍റെ സഹകരണത്തോടെ നടക്കുന്ന മേള 26ന്​ സമാപിക്കും. ഇന്ത്യൻ സിനിമയിലെ ഇതിഹാസം കമൽഹാസൻ, മലയാള സിനിമയിലെ ലേഡി സൂപ്പർ സ്റ്റാർ മഞ്ജു വാര്യർ ഉൾപ്പെടെ ദക്ഷിണേന്ത്യയിലെ പ്രമുഖ സിനിമതാരങ്ങളും ഗായകരും അണിനിരക്കും. മഹാമാരി എത്തിയശേഷം ഷാർജ ആതിഥ്യം വഹിക്കുന്ന ഏറ്റവും വലിയ ഇന്ത്യൻ മേളയാണിത്​.

അതിമനോഹര സാംസ്​കാരിക പരിപാടികളാൽ സമ്പന്നമായിരിക്കും മൂന്ന് സായാഹ്നങ്ങളും. പ്രവാസി സംരംഭകർ വിജയമന്ത്രങ്ങൾ പങ്കുവെക്കുന്ന 'ബോസസ്​ ഡേ ഔട്ട്', വ്യവസായ പ്രമുഖരും നയതന്ത്ര പ്രതിനിധികളും ധനകാര്യ വിദഗ്​ധരും ആശയങ്ങൾ പങ്കുവെക്കുന്ന ബിസിനസ്​ കോൺക്ലേവ്​, വീടൊരുക്കുന്നവർക്ക്​ വഴികാട്ടിയാവുന്ന പ്രോപ്പർട്ടി ഷോ, വിവിധ മേഖലകളിൽ വ്യക്തിമുദ്ര പതിപ്പിച്ച വനിതകളെ ആദരിക്കുന്ന ഇന്തോ-അറബ്​ വിമൻ എക്സലൻസ്​ അവാർഡ്​, രുചിയുടെ മാമാങ്കമൊരുക്കുന്ന ടേസ്റ്റി ഇന്ത്യ, അനന്തമായ നിക്ഷേപസാധ്യതകളുടെ ലോകത്തേക്ക്​ കൂട്ടിക്കൊണ്ടുപോകുന്ന ഓപർച്യൂണിറ്റി സോൺ, സഞ്ചാര ​പ്രേമികളുടെ ഇഷ്ട ഇടമായ ഡ്രീം ഡെസ്റ്റിനേഷൻ, വിദ്യാഭ്യാസ-കരിയർ മാർഗനിർദേശങ്ങൾ നൽകുന്ന നോളഡ്ജ്​ സോൺ തുടങ്ങിയവ ഈ സീസണിന്‍റെ പ്രത്യേകതകളാണ്​. ടൂറിസം, വിദ്യാഭ്യാസം, ആരോഗ്യം തുടങ്ങിയ മേഖലകളിലെ അനന്തസാധ്യതകളിലേക്ക്​ വിരൽചൂണ്ടുന്നതായിരിക്കും നാലാം എഡിഷൻ.