കോപ്​ 28: ആശങ്കയും പരിഹാരങ്ങളുമായി ലോകനേതാക്കൾ

ദുബൈ: ലോകനേതാക്കൾ ഒഴുകിയെത്തിയ ​കോപ്​ 28 ഉച്ചകോടിയുടെ രണ്ടാം ദിനത്തിൽ ഭൂമിയുടെ ഭാവിയെ കുറിച്ച ആശങ്കകളും പരിഹാര പ്രഖ്യാപനങ്ങളും നിറഞ്ഞുനിന്നു. രാവിലെ വേദിയിലെത്തിയ ലോകനേതാക്കളെ ഓരോരുത്തരെയായി യു.എൻ സെക്രട്ടറി ജനറൽ അന്റോണിയോ ഗുട്ടെറസും യു.എ.ഇ പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാനുമാണ്​ സ്വീകരിച്ചത്​. പിന്നീട്​ ഉച്ചകോടിയെ അഭിസംബോധന ചെയ്ത്​ സംസാരിച്ച ശൈഖ്​ മുഹമ്മദ്​, കാലാവസ്ഥ വ്യതിയാന പരിഹാര പദ്ധതികൾക്ക് 3000 കോടി ഡോളർ പ്രഖ്യാപിച്ചു. കാലാവസ്ഥ സാമ്പത്തിക വിടവ് നികത്തുന്നതിനാണ് ഈ ഫണ്ട് രൂപകൽപന ചെയ്തിരിക്കുന്നത്.

ആൾടെറ എന്ന് പേരിട്ടിരിക്കുന്ന ഫണ്ടിനെ കാലാവസ്ഥ ധനസഹായം വർധിപ്പിക്കുന്നതിന് ഉപയോഗിക്കും. യു.എ.ഇക്ക്​ കാലാവസ്ഥ പ്രവർത്തനങ്ങളുടെ ഒരു നീണ്ട ചരിത്രമുണ്ട്. 2050ഓടെ നെറ്റ് സീറോ കൈവരിക്കുമെന്നും 2030ഓടെ കാർബൺ ഉദ്‌വമനം 40 ശതമാനം കുറക്കുമെന്നും ശുദ്ധമായ ഊർജത്തിനായി ശതകോടികൾ നിക്ഷേപിക്കുമെന്നും ശൈഖ്​ മുഹമ്മദ്​ വ്യക്​തമാക്കി.രണ്ടാം ദിവസത്തെ ആദ്യ സെഷനിൽ സംസാരിച്ച ചാൾസ്​ രാജാവ് ലോകരാജ്യങ്ങൾ കാലാവസ്ഥ കാര്യത്തിൽ യോജിച്ച തീരുമാനത്തിലെത്തണമെന്ന്​ ആവശ്യപ്പെട്ടു. കോപ്​ 28 ശരിയായ പരിവർത്തനം സംഭവിക്കുന്ന ഒരു സന്ദർഭമാകട്ടെയെന്ന്​ ഞാൻ വളരെ ഹൃദയപൂർവം പ്രാർഥിക്കുകയാണ്​ -അദ്ദേഹം കൂട്ടിച്ചേർത്തു.​

വേദിയിൽ സംസാരിച്ച ബ്രസീൽ പ്രസിഡന്‍റ്​ ലൂയിസ്​ ലുലു ഡ സിൽവ, യാഥാർഥ്യമാകാത്ത കാലാവസ്ഥ കരാറുകളാൽ ഭൂമി വിഷമവൃത്തത്തിലായിരിക്കുകയാണെന്ന്​ പറഞ്ഞു. കാലാവസ്ഥക്ക്​ ചെലവഴിക്കുന്നതിനേക്കാൾ കൂടുതലാണ്​ ആയുധങ്ങൾക്കുവേണ്ടി ഉപയോഗിക്കുന്നത്​. ലോകത്തെ നിരവധി ദരിദ്രരാജ്യങ്ങളുടെ തലക്കുമുകളിലൂടെ പറക്കുന്ന ക്രൂസ്​ മിസൈലുകൾ കാർബൺ പുറന്തള്ളുന്നുണ്ടെന്നും അദ്ദേഹം കൂട്ടിച്ചേർത്തു.

തുടർന്ന്​ യു.എൻ ജനറൽ അസംബ്ലി പ്രസിഡന്‍റ്​ ഡെന്നിസ്​ ഫ്രാൻസിസ്​ സംസാരിച്ചു. പാരീസ് ഉടമ്പടിയുടെ തത്ത്വങ്ങൾ കാലാവസ്ഥ പ്രതിസന്ധിയെ നേരിടാൻ പ്രധാനമാണെന്നും ദുർബല രാജ്യങ്ങളെ സംരക്ഷിക്കുന്നത്​ അഭിസംബോധന ചെയ്യപ്പെടണമെന്നും അദ്ദേഹം കൂട്ടിച്ചേർത്തു.തുടർന്ന്​ സംസാരിച്ച ജോർഡൻ രാജാവ്​ അബ്​ദുല്ല രണ്ടാമൻ, തങ്ങളുടെ വൈദ്യുതി ഉൽപാദനം 2030ഓടെ പുനരുപയോഗ ഊർജത്തിൽ നിന്നാക്കാൻ ശ്രമിക്കുന്നുണ്ടെന്നും പ്രഖ്യാപിച്ചു.

കാലാവസ്ഥ പ്രതിസന്ധിയുടെ യാഥാർഥ്യം മനസ്സിലാക്കിയാണ്​ മുന്നോട്ടു​പോകുന്നതെന്ന്​ ഈജിപ്​ത്​ പ്രസിഡൻറ്​ അബ്​ദുൽ ഫത്താഹ്​ അൽസീസിയും പറഞ്ഞു. മറ്റു നിരവധി രാഷ്​​ട്ര പ്രതിനിധികളും തങ്ങളുടെ രാഷ്ട്രത്തിന്‍റെ നിലപാട്​ രണ്ടാം ദിനത്തിലെ വേദിയിൽ വ്യക്​തമാക്കി.