കോവിഡ് മാനദണ്ഡം: അബൂദബി സ്​കൂളുകൾക്ക് ഇളവ് നൽകാൻ ആലോചന

അബൂദബി: വാക്​സിനേഷൻ നിരക്കി​െൻറ അടിസ്ഥാനത്തിൽ സ്​കൂളുകൾക്ക് കോവിഡ് സുരക്ഷ മാനദണ്ഡങ്ങളിൽ ഇളവ് നൽകാൻ ആലോചിക്കുന്നതായി അബൂദബി. വാക്​സിനേഷൻ നിരക്ക് ഉയർന്ന സ്​കൂളുകളിൽ സാമൂഹിക അകലം പാലിക്കൽ, മാസ്​ക്​ ധരിക്കൽ, ക്ലാസ് മുറികളിലെയും ബസുകളിലെയും വിദ്യാർഥികളുടെ എണ്ണം പരിമിതപ്പെടുത്തൽ തുടങ്ങിയവയിൽ ഇളവ് നൽകുന്ന കളർകോഡ് സംവിധാനം അക്കാദമിക് വർഷത്തി​െൻറ രണ്ടാം ടേം മുതൽ നടപ്പാക്കും. സ്​കൂൾ വിദ്യാർഥികളിൽ വാക്​സിനേഷൻ സ്വീകരിച്ച ശതമാനത്തി​െൻറ അടിസ്ഥാനത്തിലാവും പദ്ധതി നടപ്പാക്കുക.

അമ്പതു ശതമാനത്തിൽ താഴെ വിദ്യാർഥികൾ വാക്​സിൻ സ്വീകരിച്ച സ്​കൂളുകൾ ഓറഞ്ച് ​ഗണത്തിലാവും ഉൾപ്പെടുക. 50 മുതൽ 64 ശതമാനം വരെ വാക്​സിനേഷൻ നിരക്കുള്ള സ്​കൂൾ മഞ്ഞ ​ഗണത്തിലും 65 മുതൽ 84 ശതമാനം വരെ വാക്​സിനേഷൻ നിരക്കുള്ള സ്​കൂൾ നീല ​ഗണത്തിലുമാകും ഉൾപ്പെടുക. നീല ഗണത്തിൽ ഉൾപ്പെടുന്ന സ്​കൂളുകൾക്കാണ്​ ഏറെ ഇളവുകൾ ലഭിക്കുക. അബൂദബി ദുരന്ത നിവാരണ സമിതി പദ്ധതിക്ക് അനുമതി നൽകിയിട്ടുണ്ട്​. ഉയർന്ന നിരക്കിൽ വാക്​സിനേഷനുള്ള സ്​കൂളുകളിൽ കോവിഡ് മാനദണ്ഡങ്ങളിൽ കൂടുതൽ ഇളവുകൾ ലഭിക്കുന്നത്​ കുട്ടികൾക്കും സൗകര്യപ്രദമാകും.

കുട്ടികൾക്കുവേണ്ടി അബൂദബിയിലുടനീളം സൗജന്യ വാക്​സിനേഷൻ കേന്ദ്രങ്ങൾ സജ്ജമാക്കിയിട്ടുണ്ട്. ഫൈസർ വാക്​സിൻ 12 വയസ്സുമുതൽ മുകളിലേക്കുള്ളവർക്കും സിനോഫാം മൂന്നു വയസ്സിന്​ മുകളിലുള്ള കുട്ടികൾക്കും സ്വീകരിക്കാം.

വാക്​സിനെടുക്കാത്ത കുട്ടികൾക്ക്​ പി.സി.ആർ നിർബന്ധം

അബൂദബി: സ്​കൂളുകളിലെത്തുന്ന വാക്​സിനെടുക്കാത്ത വിദ്യാർഥികൾക്ക് ഓരോ ഏഴു ദിവസം കൂടുമ്പോഴും പി.സി.ആർ നെ​ഗറ്റിവ് സർട്ടിഫിക്കറ്റ് നിർബന്ധമാക്കി അബൂദബി. വാക്​സിനേഷൻ പൂർത്തിയാക്കിയവർ പി.സി.ആർ പരിശോധന 30 ദിവസം കൂടുമ്പോൾ എടുത്താൽ മതിയാവും. സ്​കൂളുകളിൽ പാലിക്കേണ്ട മാനദണ്ഡങ്ങൾ പുതുക്കിയത് ഈ മാസം മുതലാണ് പ്രാബല്യത്തിൽവന്നത്. 16 വയസ്സിൽ കൂടുതലുള്ളവർ സ്​കൂളിൽ ഹാജരാകാൻ വാക്​സിൻ സ്വീകരിക്കണമെന്നാണ്​ നിയമം. മതിയായ കാരണമില്ലാതെ വാക്​സിനെടുക്കാത്ത കുട്ടികൾക്ക് സ്​കൂൾ കാമ്പസുകളിൽ പ്രവേശനം അനുവദിക്കില്ലെന്നാണ് അധികൃതർ നിഷ്​കർഷിച്ചിരിക്കുന്നത്. 11 വയസ്സിൽ താഴെയുള്ള കുട്ടികൾക്ക് സ്​കൂളുകളിൽ എത്തണമെങ്കിൽ 30 ദിവസം കൂടുമ്പോൾ നെ​ഗറ്റിവ് പി.സി.ആർ സർട്ടിഫിക്കറ്റ് ഹാജരാക്കേണ്ടതുണ്ട്.