ഒരാളിൽനിന്ന്​ കോവിഡ്​ പടർന്നത്​ 45 പേരിലേക്ക്​

ദുബൈ: കോവിഡ്​ മുൻകരുതൽ നിർദേശങ്ങൾ പാലിക്കാതെ പരിപാടികളിൽ പ​െങ്കടുത്ത ഒരാളിൽനിന്ന്​ വൈറസ്​ പടർന്നത്​ 45 പേരിലേക്ക്​. ഇവരിൽ ഒരാൾ മരിക്കുകയും ചെയ്​തു.യു.എ.ഇ ആരോഗ്യമന്ത്രാലയ വക്താവ്​ ഡോ. ഒമർ അൽ ഹമ്മദിയാണ്​ ഇക്കാര്യം അറിയിച്ചത്​. ഇത്തരം ഉത്തരവാദിത്തമില്ലാത്ത പ്രവൃത്തികളിൽനിന്ന്​ എല്ലാവരും ഒഴിവായി നിൽക്കണമെന്നും അദ്ദേഹം മുന്നറിയിപ്പ്​ നൽകി.രോഗലക്ഷണങ്ങളുള്ളയാളാണ്​ അത്​ ഗൗനിക്കാതെ പുറത്തിറങ്ങിയത്​. ഇയാളുടെ ഭാര്യക്കും മൂന്നു​ കുടുംബങ്ങളിലെ 44 പേർക്കുമാണ്​ രോഗം പടർന്നത്​. ഇവരിൽ 90 വയസ്സുള്ളയാളെ ഐ.സി.യുവിൽ പ്രവേശിപ്പിക്കുകയും പിന്നീട്​ മരിക്കുകയും ചെയ്​തു.

എല്ലാവർക്കും ഉത്തരവാദിത്തങ്ങളുണ്ടെന്നും മുൻകരുതൽ തുടരണമെന്നും അദ്ദേഹം ഓർമിപ്പിച്ചു. ​അതേസമയം, ഏറ്റവും കുറവ്​ മരണനിരക്ക്​ റിപ്പോർട്ട്​ ചെയ്യപ്പെട്ട രാജ്യം യു.എ.ഇയാണെന്ന്​ അദ്ദേഹം പറഞ്ഞു. 0.5 ശതമാനമാണ്​ ഇവിടെയുള്ള മരണനിരക്ക്​. രോഗികളുമായി താരതമ്യം ചെയ്യു​േമ്പാൾ ഏറ്റവും കൂടുതൽ രോഗമുക്തരുള്ളതും യു.എ.ഇയിലാണ്​.90 ശതമാനത്തിലേറെ പേരും ​സുഖംപ്രാപിച്ചിട്ടുണ്ട്​. രാജ്യത്തെ ആരോഗ്യ മേഖലയുടെ മികവാണ്​ ഇത്​ കാണിക്കുന്നത്​. 24 മണിക്കൂറിനിടെ 71,334 ​പരിശോധനകളാണ്​ നടത്തിയത്​.ഇതുവരെ 75 ലക്ഷം പേരെ കോവിഡ്​ പരിശോധനക്ക്​ വിധേയരാക്കിയെന്നും അ​ധികൃതർ അറിയിച്ചു. വാക്​സിൻ പരീക്ഷണവും സജീവമായി നടക്കുന്നുണ്ട്​.