ഒ.ടി.പി പോലും വരാതെ ക്രെഡിറ്റ്​ കാർഡ്​ തട്ടിപ്പ്​; യു.എ.ഇയിൽ മലയാളിക്ക്​ നഷ്ടമായത്​ ഏഴ്​ ലക്ഷം

ദുബൈ: ഓൺലൈൻ തട്ടിപ്പിൽ നിന്ന്​ രക്ഷപെടാൻ പ്രധാനമായും നൽകുന്ന നിർദേശമാണ്​ ഒ.ടി.പി പറഞ്ഞു കൊടുക്കരുതെന്നത്. എന്നാൽ, ഒ.ടി.പി പോലും നൽകാതെ പണം നഷ്ടമായതിന്‍റെ ഞെട്ടലിലാണ്​ ഫുജൈറയിൽ താമസിക്കുന്ന പൊന്നാനി സ്വദേശിയായ എൻജിനീയർ. ഇദ്ദേഹം നാട്ടിലായിരുന്ന സമയത്ത്​ 35,394 ദിർഹമാണ് (ഏഴ്​ ലക്ഷം രൂപ)​ ഒറ്റയടിക്ക്​ തട്ടിപ്പുകാർ ക്രെഡിറ്റ്​ കാർഡിൽ നിന്ന്​​ വലിച്ചത്​. താൻ പിൻവലിക്കാത്ത പണം തിരിച്ചടക്കേണ്ട അവസ്ഥയിലാണ്​ ഇദ്ദേഹം. ഫുജൈറ പൊലീസിൽ നൽകിയ പരാതിയിൽ നടപടിയുണ്ടാകുമെന്ന പ്രതീക്ഷയിലാണ്​.

യു.എ.ഇ കേന്ദ്രീകരിച്ച്​ പ്രവർത്തിക്കുന്ന ബാങ്കിന്‍റെ ക്രെഡിറ്റ്​ കാർഡാണ്​ ഇദ്ദേഹം ഉപയോഗിച്ചിരുന്നത്​. കഴിഞ്ഞ മാസം 12ന്​ ഉച്ചയോടെ പത്ത്​ ദിർഹം ക്രെഡിറ്റ്​ കാർഡ്​ അക്കൗണ്ടിൽ നിന്ന് ഇത്തിസാലാത്തിന്‍റെ ക്യൂക്ക്​ പേയിലേക്ക്​ പിടിച്ചതായി മെസേജ്​ വന്നിരുന്നു. ഇത്​ കാര്യമാക്കിയില്ല. ഇതിന്​ ശേഷം ഒരു മണിക്കൂർ കഴിഞ്ഞതോടെയാണ്​ 35,394 ദിർഹം അക്കൗണ്ടിൽ നിന്ന്​ നഷ്ടമായത്​. എന്നാൽ, പണം നഷ്ടമായതായി ഇ-മെയിലോ എസ്​.എം.എസോ ല​ഭിച്ചിരുന്നില്ല. ഒരാഴ്ച കഴിഞ്ഞ്​ ക്രെഡിറ്റ്​ കാർഡ്​ ​​േബ്ലാക്കായപ്പോഴാണ് പണം നഷ്ടമായ​ വിവരം അറിയുന്നത്​.

ഈ കാർഡ്​ ഉപയോഗിച്ച്​ ഓ​ൺലൈൻ പർച്ചേസ്​ വെബ്​സൈറ്റായ നൂൺ ഡോട്​കോം വഴി ഐ ഫോൺ വാങ്ങിയതായി സ്​റ്റേറ്റ്​മെന്‍റിൽ കാണിക്കുന്നുണ്ട്​. ബിസിനസ്​ ബേയിലാണ്​ ഫോൺ നൽകിയിരിക്കുന്നത്​. എന്നാൽ, ആരാണ്​ ഫോൺ വാങ്ങിയിരിക്കുന്നത്​ എന്ന വിവരം ഇവർ വ്യക്​തമാക്കുന്നില്ല. പൊലീസ്​ അന്വേഷണത്തിൽ ഇത്​ വ്യക്​തമാകുമെന്നാണ്​ പ്രതീക്ഷ. ബാക്കി തുക ക്രിപ്​റ്റോ കറൻസിയായി മാറ്റുകയായിരുന്നു. ബാങ്കിൽ പരാതി അറിയിച്ചെങ്കിലും അവിടെ നിന്ന്​ ഒ.ടി.പി അയച്ചുവെന്നാണ്​ അധികൃതർ പറയുന്നത്​. എന്നാൽ, ഫോണിൽ ഒ.ടി.പി എത്തിയിട്ടുമില്ല. എന്നിട്ടും എങ്ങിനെയാണ്​ തട്ടിപ്പ്​ നടന്നതെന്ന്​ വ്യക്​തമല്ല.

ഇക്കാര്യം സൂക്ഷിക്കാം:

ക്രെഡിറ്റ്​ കാർഡ്​ അക്കൗണ്ടിന്‍റെ ലിമിറ്റ്​ പരമാവധി കുറക്കണമെന്നാണ്​ അനുഭവ​ത്തിന്‍റെ വെളിച്ചത്തിൽ ഇദ്ദേഹം​ പറയുന്നത്​.

• ടിക്കറ്റ്​ എടുക്കാനും അത്യാവശ്യ കാര്യങ്ങൾക്കും മാത്രം ക്രെഡിറ്റ്​ കാർഡ്​ ഉപയോഗിക്കുക.
• നാട്ടിൽ പോകുന്ന സമയത്ത്​ ക്രെഡിറ്റ്​ കാർഡ്​ താൽകാലികമായി ​േബ്ലാക്ക്​ ചെയ്യാനുള്ള സംവിധാനമുണ്ട്​, ഇത്​ ഉപയോഗപ്പെടുത്തുക.
• നാട്ടിലാണെങ്കിലും ഇടക്കിടെ നെറ്റ്​ ബാങ്കിങ്​ പരിശോധിക്കുക.
• പർച്ചേസുകൾക്ക്​ മാത്രമായി ക്രെഡിറ്റ്​ കാർഡ്​ ലിമിറ്റ്​ ചെയ്യാൻ കഴിയും.
• പരിചയമില്ലാത്ത സ്ഥലങ്ങളിലും വെബ്​സൈറ്റുകളിലും ക്രെഡിറ്റ്​ കാർഡ്​ നൽകാതിരിക്കുക.
• ക്രെഡിറ്റ്​ കാർഡ്​ വിവരങ്ങൾ പുറത്തു നൽകാതിരിക്കുക.
• ചെറിയ തുക പിൻവലിച്ചതായി മെസേജ്​ വന്നാൽ പോലും ഉടൻ ബാങ്കിനെ വിവരം അറിയിക്കുക.
• അസ്വാഭാവികമായി എന്തെങ്കിലും ശ്രദ്ധയിൽപെട്ടാൻ ഉടൻ കാർഡ്​ ​േബ്ലാക്ക്​ ചെയ്യുക.
• നെറ്റ്​ ബാങ്കിങ്​ ഉ​പയോഗിക്കുന്ന ഫോണിൽ അനാവശ്യ ആപ്പുകൾ ഡൗൺലോഡ്​ ചെയ്യാതിരിക്കുക തുടങ്ങിയ നിർദേശങ്ങളും നൽകുന്നു.