കടക്കെണി മൂലം ദുരിതത്തിലായ ശിവരാമൻ എൻജിനീയർ നിര്യാതനായി

അബൂദബി: ബിസിനസ് തകർച്ചയും കടക്കെണിയും രോഗവും മൂലം ദുരിതക്കയത്തിലായ എൻജിനീയറും തൃശൂർ ചാഴൂർ സ്വദേശിയുമായ ചെമ്മാനി കുഞ്ചാക്കൻ ശിവരാമൻ​ (73) നിര്യാതനായി. പ്രായാധിക്യത്തോടൊപ്പം പ്രമേഹം, വൃക്കരോഗം, ഹൃദ്രോഗം തുടങ്ങിയവയാൽ ബുദ്ധിമുട്ടിയ ശിവരാമൻ അബൂദബി ശൈഖ് ഷഖ്ബൂത്ത് ആശുപത്രിയിൽ നിന്ന് ഒരുമാസം മുമ്പ് ഡിസ്ചാർജായ ശേഷം ഇന്ത്യൻ സ്ഥാനപതി കാര്യാലയത്തി​െൻറ സംരക്ഷണയിലായിരുന്നു.

പ്രമേഹത്തെ തുടർന്ന്​ മുട്ടിന്​ താഴെ കാൽ മുറിച്ചു. മുസഫയിൽ എംബസി ഏർപ്പാടാക്കിയ അഭയ കേന്ദ്രത്തിൽ കഴിയുന്നതിനിടെയാണ് മരണം. കേസുകൾ ഉള്ളതിനാൽ നാട്ടിൽ പോകാൻ കഴിയാത്ത അവസ്​ഥയിലായിരുന്നു.

മൃതദേഹ പരിശോധനയിൽ കോവിഡ്​ പോസിറ്റിവാണെന്ന്​ കണ്ടെത്തിയതോടെ അൽഐൻ ശ്മശാനത്തിൽ സംസ്‌കരിക്കുമെന്ന്​ സാമൂഹിക പ്രവർത്തകർ അറിയിച്ചു.ഭാര്യ: സുഷമ (മഹാരാഷ്​ട്ര). മകൻ: സാം ശിവരാമൻ. മാതാപിതാക്കൾ: പരേതരായ ചെമ്മാനി കുഞ്ചാക്കൻ, കൊച്ചമ്മു.