ദുബൈ എക്​സ്​പോ അവസാനിക്കുന്നു; വിദ്യാർഥികളെ പറഞ്ഞു പറ്റിച്ച്​ കേന്ദ്ര സർക്കാർ

ദുബൈ: വിവിധ സംസ്ഥാനങ്ങളിൽ നിന്ന്​ തെരഞ്ഞെടുക്കപ്പെട്ട 112 വിദ്യാർഥികൾക്ക്​ ദുബൈ എക്സ്​പോ കാണാൻ അവസരമൊരുക്കുമെന്ന കേന്ദ്ര സർക്കാരിന്‍റെ വാഗ്ദാനം വെള്ളത്തിലായി. പരീക്ഷകളും ഇന്‍റർവ്യൂവും നടത്തി വിദ്യാർഥികളെ തെരഞ്ഞെടുത്ത്​ ആശ നൽകിയ ശേഷമാണ്​ കേന്ദ്രം മൗനത്തിലാണ്ടത്​. മാർച്ച്​ 31ന്​ എക്സ്​പോ അവസാനിക്കാനിരിക്കെ പ്രതീക്ഷ നഷ്ടപ്പെട്ട അവസ്ഥയിലാണ്​ വിദ്യാർഥികൾ. ഇതുമായി ബന്ധപ്പെട്ട്​ വിവിധ സംസ്ഥാനങ്ങളിലെ ജില്ലാ ഭരണകൂടങ്ങൾ കേന്ദ്രത്തിന്​ കത്തയച്ചെങ്കിലും മറുപടിയില്ല.

നീതി ആയോഗിന്‍റെ ഭാഗമായ ആസ്പിരേഷനൽ ഡിസ്​ട്രിക്​ട്​ പ്രോഗ്രാമിൽ ഉൾപെട്ട 112 ജില്ലകളിലെ കുട്ടികളെ മഹാമേളയായ ദുബൈ എക്സ്​പോയിലെത്തിക്കുമെന്നായിരുന്നു കേന്ദ്രത്തിന്‍റെ വാഗ്​ദാനം. കേരളത്തിൽ നിന്ന്​ വയനാട്​ മാത്രമാണ്​ ഈ പട്ടികയിലുള്ളത്​. യു.എ.ഇയുടെ 50ാം വാർഷികം ആഘോഷിക്കുന്ന ഡിസംബർ രണ്ടിന്​ കുട്ടികളെ എത്തിക്കുമെന്ന്​ ദുബൈയിലെ ഇന്ത്യൻ കോൺസുൽ ജനറൽ ഡോ. അമൻപുരിയും പ്രസ്താവിച്ചിരുന്നു. ഇതിന്‍റെ ഭാഗമായി വിവിധ ജില്ലകളിൽ വിദ്യാർഥികൾക്കായി പരീക്ഷ നടത്തി.

അന്താരാഷ്ട്ര നിലവാരത്തിൽ നടന്ന പരീക്ഷയായതിനാൽ ഓരോ ജില്ലക്കും​ ഒന്നര ലക്ഷത്തോളം രൂപ പരീക്ഷക്കായി അനുവദിച്ചു. കലക്ടറുടെ കീഴിൽ വരുന്ന പ്ലാനിങ്​ ഓഫിസർക്കായിരുന്നു ചുമതല. എഴുത്ത്​ പരീക്ഷ, അഭിരുചി പരീക്ഷ, സ്പീച്ച്​, ഇന്‍റർവ്യൂ തുടങ്ങിയ ഘട്ടങ്ങൾ പിന്നിട്ടാണ്​ കുട്ടികൾ തെരഞ്ഞെടുക്കപ്പെട്ടത്​. വയനാട്ടിൽ 62 കുട്ടികൾ പ​ങ്കെടുത്തു. ഇതിൽ നിന്ന്​ 14 കുട്ടികളെയും അടുത്ത റൗണ്ടിലെ വിജയികളിൽ നിന്ന്​ ആറ്​ പേരെയും തെര​ഞ്ഞെടുത്തിരുന്നു. അവസാന ഇന്‍റവ്യൂവിലാണ്​ മാനന്തവാടി കോറോത്ത്​ സ്വദേശിയായ പത്താം ക്ലാസുകാരനെ എക്സ്​പോ കാണാൻ തെരഞ്ഞെടുത്തത്​.

കുട്ടികളുടെ വിവരങ്ങളെല്ലാം മന്ത്രാലയത്തിനും നീതി ആയോഗിനും അയച്ചുകൊടുത്തെങ്കിലും 'നടപടികൾ തുടരുന്നുണ്ട്'​ എന്നായിരുന്നു മറുപടി. പിന്നീട്​ ഒമിക്രോണിന്‍റെ പേരിൽ വീണ്ടും നീട്ടി. അനന്തമായി നീണ്ടതോടെ കലക്​ടറേറ്റുകളിൽ നിന്ന്​ കത്ത്​ അയച്ചെങ്കിലും ഇപ്പോൾ മറുപടി പോലും ലഭിക്കുന്നില്ല.

ദുബൈയിൽ പോകാമെന്ന്​ ആശിച്ച കുട്ടികൾ മാനസീകമായി ബുദ്ധിമുട്ടിലാണ്​. ഈ വിഷയം ചൂണ്ടിക്കാണിച്ച്​ കുട്ടികളുടെ രക്ഷിതാക്കൾ കലക്ടർക്ക്​ പരാതി നൽകിയിരുന്നു. ഈ പരാതികൾ കേന്ദ്രത്തിന്​ അയച്ചിട്ടും മറുപടി ലഭിച്ചിട്ടില്ല. 12 ദിവസം മാത്രമാണ്​ ഇനി എക്സ്പോയുള്ളത്​. ഇതിനിടയിൽ വിസയും ടിക്കറ്റും ശരിയാക്കി എക്സ്​പോയിൽ കുട്ടികളെ എത്തിക്കാനുള്ള സാധ്യതയും വിരളമാണ്​.