ദുബൈ ഇൻറർനാഷ്​ണൽ സിറ്റി ​മേൽപാലങ്ങൾ അടുത്താഴ്​ച തുറക്കും

ദുബൈ: ദുബൈ ഇൻറർ നാഷ്​ണൽ സിറ്റി (ഡി.​െഎ.സി) നിവാസികളുടെ യാത്രാ ക്ലേശത്തിന്​ പരിഹാരമാകുന്ന രണ്ട്​ മേൽപാലങ്ങൾ അടുത്താഴ്​ച തുറന്നുകൊടുക്കുമെന്ന്​ റോഡ്​സ്​ ആൻറ്​ ​ട്രാൻസ്​പോർട്ട്​ അതോറിറ്റി (ആർ.ടി.എ) അറിയിച്ചു. ജൂലൈ 14 മുതൽ ഇതുവഴി ഗതാഗതം അനുവദിക്കും. ഡി​.​െഎ.സിയിൽ നിന്ന്​ അൽ അവീർ റോഡിൽ ഹത്ത ഭാഗത്തേക്ക്​ എത്തുന്നതാണ്​ ഒരു മേൽപാലം.

ഡി.​െഎ.സിയിൽ നിന്ന്​ ദുബൈ ഡൗൺ ടൗണിലേക്കുള്ളതാണ്​ അടുത്തത്​. ഡി.​െഎ.സിയുടെ നിർമാതാക്കളായ നഖീലുമായി ചേർന്നാണ്​ പാലങ്ങൾ നിർമിച്ചത്​. ഇത്​ ഗതാഗതക്കുരുക്ക്​ കുറക്കാൻ സഹായിക്കും. ഡ്രാഗൺ മാർട്ടി​​െൻറ വിപുലീകരണത്തോടെ ഇൗ പാലങ്ങളുടെ പ്രാധാന്യം വർധിക്കുമെന്ന്​ ആർ.ടി.എ. ഡയറക്​ടർ ജനറൽ മത്താർ അൽ തായർ പറഞ്ഞു. മണിക്കൂറിൽ 1000 വാഹനങ്ങൾക്ക്​ സഞ്ചരിക്കാൻ സാധിക്കും വിധമാണ്​ ഡി.​െഎ.സിയിൽ നിന്ന്​ ഡൗൺടൗണിലേക്കുള്ള പാലം നിർമിച്ചിരിക്കുന്നത്​.

അൽ അവീർ റോഡിലെയും ശൈഖ്​ സായിദ്​ ബിൻ ഹംദാൻ അൽ നഹ്യാൻ റോഡിലെയും റൗണ്ടെബൗട്ടിലെ വാഹനത്തിരക്ക്​ കുറക്കാനും ഇത്​ സഹായിക്കും. ഹത്തയിൽ നിന്ന്​ വരുന്നവർക്ക്​ അൽ അവീർ റോഡ്​ വഴി എളുപ്പത്തിൽ ഡ്രാഗൺ മാർട്ടിലേക്കും ഇൻറർനാഷ്​ണൽ സിറ്റിയിലേക്കും വരാനും സഹായകരമാണ്​. പാലങ്ങളുടെ അവസാന മിനുക്കുപണികളാണ്​ ഇപ്പോൾ നടക്കുന്നത്​. വാർസൻ റോഡിൽ സ്​ഥാപിച്ച ഇരട്ടവരി മേൽപാലവും പദ്ധതിയുടെ ഭാഗമാണ്​.