പഹൽഗാം; കൊല്ലപ്പെട്ടവരിൽ ദുബൈ പ്രവാസി

ദുബൈ: പഹൽഗാമിലുണ്ടായ ഭീകരാക്രമണത്തിൽ കൊല്ലപ്പെട്ടവരിൽ ദുബൈയിൽ ജോലി ചെയ്തിരുന്ന പ്രവാസിയും. 33 വയസ്സുകാരനായ നീരജ്​ ഉദ്വാനിയാണ്​ മരിച്ചതെന്ന്​ കുടുംബ വൃത്തങ്ങളെ ഉദ്ധരിച്ച്​ മാധ്യമങ്ങൾ വെളിപ്പെടുത്തി. ഭാര്യയോടൊപ്പം കശ്മീരിൽ വിനോദസഞ്ചാരത്തിന്​ പോയതായിരുന്നു.

ജയ്പുർ സ്വദേശിയായ നീരജ്​ ചെറുപ്പം മുതൽ ദുബൈയിലാണ്​ വളർന്നത്​​. നിലവിൽ സ്വകാര്യ വിദ്യാഭ്യാസ സ്ഥാപനത്തിൽ ഫിനാൻസ്​ രംഗത്താണ്​​ ജോലി​.2023ൽ വിവാഹിതരായ ദമ്പതികൾ സുഹൃത്തിന്‍റെ വിവാഹ ചടങ്ങുകൾക്കാണ്​ ഇന്ത്യയിലെത്തിയത്​. കൂടെയുള്ളവർ പലരും ദുബൈയിലേക്ക്​ മടങ്ങിയെങ്കിലും നീരജും ഭാര്യയും കശ്മീരിലേക്ക്​ പോവുകയായിരുന്നു.

കശ്മീർ സന്ദർശനം പൂർത്തിയാക്കി ദുബൈയിലേക്ക്​ മടങ്ങാനാണ് നിശ്ചയിച്ചിരുന്നത്​. ആക്രമണം നടക്കുമ്പോൾ ഭാര്യ ഹോട്ടലിൽ വിശ്രമിക്കുകയായിരുന്നു. പിന്നീടാണിവർ ദാരുണമായ സംഭവം അറിയുന്നത്​.