'എജുകഫെ' ആഗോള തലത്തിലേക്ക്​; ഷാർജ അധികൃതരുമായി കരാറൊപ്പിട്ടു

ഷാർജ: വിജ്ഞാനത്തിന്‍റെയും കരിയറിന്‍റെയും പുതുവഴികൾ വിദ്യാർഥികൾക്ക്​ സമ്മാനിച്ച്​ വിജയകരമായ ഏഴ്​ സീസണുകൾ പിന്നിട്ട 'ഗൾഫ്​ മാധ്യമം എജുകഫെ' അന്താരാഷ്ട്ര തലത്തിലേക്ക്​. യു.എ.ഇ വിദ്യഭ്യാസ മന്ത്രാലയത്തിന്‍റെ പിന്തുണയോടെ ഷാർജ സർക്കാറിന്​ കീഴിലെ എക്സ്​പോ സെന്‍ററിൽ ഒരുക്കുന്ന 18ാമത്​ അന്താരാഷ്ട്ര വിദ്യാഭ്യാസ പ്രദർശനത്തിൽ ഇന്ത്യൻ പവലിയനിൽ സംയുക്​ത സഹകരണത്തിന്​ 'എജുകഫെ' ​​​ കരാറൊപ്പിട്ടു. ഷാർജയിൽ നടന്ന ചടങ്ങിൽ എക്സ്​പോ സെന്‍റർ സി.ഇ.ഒ സെയ്​ഫ്​ മുഹമ്മദ്​ അൽ മിദ്​ഫയും 'ഗൾഫ്​ മാധ്യമം' മിഡിൽ ഈസ്റ്റ്​ ഓപറേഷൻസ്​ ഡയറക്ടർ മുഹമ്മദ്​ സലീം അമ്പലനുമാണ്​ ധാരണാപത്രത്തിൽ ഒപ്പുവെച്ചത്​. മിഡിൽ ഈസ്റ്റിലെ ഏറ്റവും വലിയ ഇന്ത്യൻ എഡ്യൂക്കേഷൻ-കരിയർ മേളയായ 'എജുകഫെ'യുടെ മുൻ​ സീസണുകളിലെ വൻ വിജയമാണ്​ വിവിധ ലോകരാജ്യങ്ങൾ പ​ങ്കെടുക്കുന്ന അന്തരാഷ്ട്ര മേളയിലെ സുപ്രധാന സാരഥ്യത്തിലേക്ക്​ നയിച്ചത്​.

അന്താരാഷ്ട്ര വിദ്യഭ്യാസ പ്രദർശനത്തിൽ 'എജുകഫെ'യുമായി സഹകരിക്കാൻ കഴിയുന്നതിൽ ഏറെ ആഹ്ലാദമുണ്ടെന്ന്​ സെയ്​ഫ്​ മുഹമ്മദ്​ അൽ മിദ്​ഫ ചടങ്ങിൽ അഭിപ്രായപ്പെട്ടു. 'കമോൺ കേരള' അടക്കം നിരവധി ​പരിപാടികളിലെ സഹകരണത്തിലൂടെ 'ഗൾഫ്​ മാധ്യമ'വുമായി ശക്​തമായ ബന്ധം എക്സ്​പോ സെന്‍ററിനുണ്ട്​. ഏറ്റവും പുതിയ വിദ്യഭ്യാസ അവസരങ്ങൾ പങ്കുവെക്കുന്ന അന്താരാഷ്ട പ്രദർശനത്തിൽ ഇത്തരമൊരു കരാറിലെത്താൻ സാധിച്ചത്​ വലിയ നേട്ടമാണ്​. യു.എ.ഇയിലെ ഇന്ത്യൻ സമൂഹത്തിന്​ ഏറെ ഉപകാരപ്പെടുമെന്ന്​ പ്രതീക്ഷിക്കുന്നു -അദ്ദേഹം കൂട്ടിച്ചേർത്തു.

'എജുകഫെ' പുതിയ തലത്തിലേക്ക്​ പ്രവേശിക്കുന്നതിന്‍റെ തുടക്കമാണ്​ കരാറെന്ന്​ മുഹമ്മദ്​ സലീം അമ്പലൻ പറഞ്ഞു. യു.എ.ഇയിലെയും ഇന്ത്യയിലെയും വിജയകരമായ നടത്തിപ്പിന്​ 'എജുകഫെ'ക്ക്​ ലഭിച്ച അംഗീകാരമാണിത്​. ഷാർജ അന്താരാഷ്ട്ര വിദ്യഭ്യാസ പ്രദർശനത്തിലെ സാന്നിധ്യത്തിലൂടെ 'എജുകഫെ' ലോകത്ത്​ തന്നെ ശ്രദ്ധിക്കപ്പെടുന്ന സംരംഭമായി മാറുകയാണ്​ -അദ്ദേഹം ചൂണ്ടിക്കാട്ടി. 'എജുകഫെ'യുടെ ഷാർജ അധികൃതരുമായുള്ള സഹകരണം വലിയ സാധ്യതകൾ തുറക്കുന്നതാണെന്നും ഇന്ത്യൻ സർവകലാശാലകൾക്കും സ്ഥാപനങ്ങൾക്കും വലിയ അവസരമാണ്​​ ഇതിലൂടെ ലഭ്യമാകുന്നതെന്നും​ 'ഗൾഫ്​ മാധ്യമം' ഗ്ലോബൽ ബിസിനസ്​ ഓപറേഷൻസ്​ ജനറൽ മാനേജർ കെ. മുഹമ്മദ്​ റഫീഖ്​ പറഞ്ഞു. എക്​സ്​പോ സെന്‍റർ സെയിൽസ്​ ആൻഡ്​ മാർക്കറ്റിങ്​ ഡയറക്ടർ സുൽത്താൻ ശത്താഫ്​, എക്സിബിഷൻ മാനേജർ ഗൗരവ്​ ഗഡ്​കരി, 'ഗൾഫ്​ മാധ്യമം' മാർക്കറ്റിങ്​ മാനേജർ ജെ.ആർ ഹാഷിം, അക്കൗണ്ട്​ മാനേജർ എസ്​.കെ അബ്​ദുല്ല എന്നിവർ ചടങ്ങിൽ പ​ങ്കെടുത്തു.

യു.എ.ഇയിലെ ഏറ്റവും ജനകീയമായ വിദ്യഭ്യാസമേളയാണ്​ 'ഇന്‍റർനാഷണൽ എഡുക്കേഷൻ ഷോ'. പ്രദർശനത്തിന്‍റെ ഈ വർഷത്തെ എഡിഷൻ ഒക്​ടോബർ 19മുതൽ 22വരെയാണ്​ സംഘടിപ്പിക്കുന്നത്​. ലോകത്തിന്‍റെ വിവിധ ഭാഗങ്ങളിൽ നിന്ന്​ വിദ്യഭ്യാസ സ്ഥാപനങ്ങളും അക്കാദമികളും പ​ങ്കെടുക്കുന്ന പ്രദർശനത്തിൽ കഴിഞ്ഞ വർഷങ്ങളിൽ ആയിരക്കണക്കിന്​ വിദ്യാർഥികളും രക്ഷിതാക്കളുമാണ്​ ഒഴുകിയെത്തിയത്​. യു.എ.ഇയിലെ വിദ്യാഭ്യാസ മേഖലക്ക്​ പുത്തനുണർവേകിയാണ്​ കഴിഞ്ഞ കാലങ്ങളിൽ 'എജുക​ഫെ' കടന്നുപോയത്​. ഇന്ത്യയിലെയും വിദേശത്തെയും യൂനിവേഴ്​സിറ്റികളും കരിയർ സ്ഥാപനങ്ങളും വിദ്യാഭ്യാസ വിദഗ്ധരും മേളയിൽ പ​ങ്കെടുക്കുകയുണ്ടായി. കഴിഞ്ഞ മാസം കേരളത്തിൽ സംഘടിപ്പിച്ച 'എജുകഫെ'യിൽ പതിനായിരക്കണക്കിന്​ വിദ്യാർഥികളാണ്​ പ​ങ്കെടുത്തത്​.