പ്രഥമ പരിഗണന തൊഴിലാളി ക്ഷേമത്തിന്​ – തഖ്​ദീർ ചെയർമാൻ

ദുബൈ: തൊഴിലാളികളുടെ അവകാശങ്ങൾക്ക്​ രാജ്യം മുഖ്യപരിഗണനയാണ്​ നൽകുന്നതെന്നും അവരുടെ ക്ഷേമവും സന്തോഷവും ഉറപ്പുവരുത്തുന്നത്​ വികസനം കൂടുതൽ വേഗത്തിലാക്കുമെന്നും ദുബൈ ഇമി​േ​ഗ്രഷൻ ഡെ.ഡയറക്​ടർ ജനറലും തൊഴില്‍കാര്യ സ്ഥിരം സമിതി ചെയർമാനുമായ മേജർ ജനറൽ ഉബൈദ്​ മുഹൈർ ബിൻ സുറൂർ പറഞ്ഞു.  തൊഴിലാളി ക്ഷേമത്തിന്​ ഏർപ്പെടുത്തിയ തഖ്​ദീർ അവാർഡ്​ നിർണയം വിജയകരമായി നടപ്പാക്കുന്നതിന്​ പിന്തുണച്ച ഉദ്യോഗസ്​ഥർക്കും വിദഗ്​ധർക്കും പുരസ്​കാരം നൽകിയ ശേഷം സംസാരിക്കുകയായിരുന്നു അദ്ദേഹം. 

തൊഴിലാളികളെ അവരുടെ അവകാശങ്ങളെക്കുറിച്ച്​ ബോധവത്​കരിക്കാൻ സാധ്യായ ശ്രമങ്ങളെല്ലാം നടത്തുന്നുണ്ട്​.  രാജ്യത്ത്​ നിലനിൽക്കുന്ന നിയമങ്ങളെക്കുറിച്ചും പെരുമാറ്റ ചട്ടങ്ങളെക്കുറിച്ചും അവരെ പഠിപ്പിക്കുന്നുമുണ്ട്​. ഇതിനായി ​മികച്ച പരിശീലകരെയാണ്​ ചുമതലപ്പെടുത്തുന്നത്​. പോയ വർഷം 20000 ലേറെ തൊഴിലാളികൾക്ക്​ ക്ലാസുകൾ നൽകി.ഇൗ വർഷം രണ്ട്​ കേന്ദ്രങ്ങളിൽ നടത്തി വരുന്ന ക്ലാസുകൾക്ക്​ പുറമെ കൈപുസ്​തകവും തയ്യാറാക്കിയിട്ടുണ്ട്​. 
അറബി, ഉറുദു, ഇംഗ്ലീഷ്​ ഭാഷകളിൽ തയ്യാറാക്കിയ പുസ്​തകത്തിൽ യു.എ.ഇയിൽ ജീവിക്കുന്ന ആളുകൾ പുലർത്തേണ്ട രീതികളും മര്യാദകളുമെല്ലാം വ്യക്​തമാക്കുന്നുണ്ട്​. യു.എ.ഇയെക്കുറിച്ച്​ കൃത്യമായ ധാരണയോടെ ഇവിടെ ജീവിക്കാൻ പ്രാപ്​തരാക്കുകയാണ്​ ഇതു കൊണ്ട്​ ലക്ഷ്യമിടുന്നതെന്നും അദ്ദേഹം പറഞ്ഞു.   തൊഴിൽ വകുപ്പ്​, ഇമിഗ്രേഷൻ തുടങ്ങിയ വകുപ്പുകളിലെ ഉദ്യോഗസ്​ഥർക്കും ജീവനക്കാർക്കും സാ​േങ്കതിക വിദഗ്​ധർക്കും ചടങ്ങിൽ ഉപഹാരങ്ങൾ സമ്മാനിച്ചു.