ചെറിയ അപകടങ്ങളും ഉടൻ ദുബൈ പൊലീസിനെ അറിയിക്കാം
text_fieldsദുബൈ: ചെറിയ അപകടങ്ങളും പൊലീസിൽ ഉടൻ റിപ്പോർട്ട് ചെയ്യുന്നതിന് ഏർപ്പെടുത്തിയ സംവിധാനത്തിന് മികച്ച സ്വീകാര്യത. കഴിഞ്ഞവർഷത്തെ അപേക്ഷിച്ച് 22 ശതമാനം വർധനവാണ് ഈ സംവിധാനത്തിനുണ്ടായത്. പൊലീസ് സ്റ്റേഷൻ സന്ദർശിക്കാതെ തന്നെ ദുബൈ പൊലീസിന്റെ സ്മാർട്ട് ആപ് വഴി ഈ സംവിധാനം ഉപയോഗപ്പെടുത്താം.
സമയലാഭവും സാമ്പത്തിക ലാഭവും ലഭിക്കുന്നതിനൊപ്പം വേഗത്തിൽ നടപടിക്രമങ്ങൾ പൂർത്തിയാക്കാൻ കഴിയുന്നു എന്നതും ഇതിന്റെ പ്രത്യേകതയാണ്. പരിക്കുകളില്ലാത്ത ചെറിയ അപകടങ്ങളാണ് ഈ ആപ് വഴി റിപ്പോർട്ട് ചെയ്യാൻ കഴിയുക.
പൊലീസ് ആപ്പിന്റെ പ്രധാന പേജിൽ തന്നെ ‘റിപ്പോർട്ടിങ് എ ട്രാഫിക് ആക്സിഡന്റ്’ എന്ന ഭാഗമുണ്ട്. ഇതുപയോഗിച്ച് അപകട വിവരം വാഹനത്തിന്റെ ചിത്രസഹിതം സമർപ്പിക്കാൻ കഴിയും. ഇത് പരിശോധിക്കുന്ന ദുബൈ പൊലീസ് അപകട റിപ്പോർട്ട് ബന്ധപ്പെട്ടവർക്ക് ഇ-മെയിൽ വഴിയോ എസ്.എം.എസ് വഴിയോ അയക്കും.
ഇതോടെ, പലതവണ പൊലീസ് സ്റ്റേഷൻ കയറിയിറങ്ങേണ്ട അവസ്ഥ ഒഴിവാകും. പൊലീസിന്റെ എല്ലാ സേവനങ്ങളും സ്മാർട്ടാക്കുന്നതിന്റെ ഭാഗമായാണ് ഇത്തരം സംവിധാനങ്ങൾ പ്രോത്സാഹിപ്പിക്കുന്നത്. മൊബൈൽ ഫോൺ വഴിയോ ലാപ്ടോപ് വഴിയോ എളുപ്പത്തിൽ നടപടികൾ പൂർത്തിയാക്കാം.
ഈ സേവനം പരമാവധി പ്രയോജനപ്പെടുത്തണമെന്ന് പൊലീസ് ഓർമിപ്പിച്ചു. അപകടം നടന്നാൽ വാഹനം റോഡരികിലേക്ക് മാറ്റിയിടണമെന്നും അതിനു ശേഷം സ്മാർട്ട് ആപ് വഴി റിപ്പോർട്ട് ചെയ്യണമെന്നും പൊലീസ് വ്യക്തമാക്കി.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.