എക്​സ്​പോ 2020: യു.എ.ഇ പവലിയൻ നിർമാണത്തിന്​ തുടക്കമായി

ദുബൈ: ചരിത്ര സംഭവമാവാൻ ഒരുങ്ങുന്ന എക്​സ്​പോ 2020 പ്രദർശനത്തിലെ ഏറ്റവും മികവുറ്റതായി മാറുന്ന ആതിഥേയ രാജ്യത്തി​​െൻറ പവലിയൻ നിർമാണത്തിന്​ തുടക്കം കുറിച്ചു. എക്​സ്​പോ 2020 ദുബൈ ഉന്നത സമിതി ചെയർമാനും ദുബൈ സിവിൽ ഏവിയേഷൻ അതോറിറ്റി പ്രസിഡൻറുമായ എമിറേറ്റ്​സ്​ സി.ഇ ശൈഖ്​ അഹ്​മദ്​ ബിൻ സഇൗദ്​ അൽ മക്​തുമാണ്​ ആരംഭം നിർവഹിച്ചത്​. യു.എ.ഇയുടെ പങ്കാളിത്തം സംബന്ധിച്ച ഒൗദ്യോഗിക കരാറും ചടങ്ങിൽ ഒപ്പുവെച്ചു. സഹമന്ത്രിയും നാഷനൽ ​മീഡിയാ കൗൺസിൽ ചെയർമാനുമായ ഡോ. സുൽത്താൻ അഹ്​മദ്​ അൽ ജാബിറും എക്​സ്​പോ2020 ഡി.ജിയും അന്താരാഷ്​ട്ര സഹകരണ വകുപ്പ്​ സഹമന്ത്രിയുമായ റീം ഇബ്രാഹിം അൽ ഹാഷിമിയുമാണ്​ ധാരണാപത്രം ഒപ്പുവെച്ചത്​.  

യു.എ.ഇയുടെ സംസ്​കാരവും പൈതൃകവും നേട്ടങ്ങളും ഭാവി​യിലേക്കുള്ള കുതിപ്പും ദൃശ്യവത്​കരിക്കുന്ന പവലിയൻ ദശലക്ഷക്കണക്കിന്​ ആളുകളെ ആകർഷിക്കുമെന്ന്​  ശൈഖ്​ അഹ്​മദ്​ പറഞ്ഞു.  രാജ്യത്തി​​െൻറ അഭിമാനവും നേതൃവൈഭവവും പ്രതീകവത്​കരിക്കുന്ന പറക്കുന്ന ഫാൽക്കണി​​െൻറ രൂപത്തിലാണ്​ യു.എ.ഇ പവലിയൻ രൂപകൽപന.  

തുറന്ന മനസ്​, സഹിഷ്​ണുത, അന്താരാഷ്​ട്ര സമൂഹങ്ങളുടെ സഹകരണം, സുസ്​ഥിര വികസനത്തിലൂടെ ജീവിത നിലവാരം മെച്ചപ്പെടുത്തൽ എന്നിവയെല്ലാം മനോഹരമായ പവലിയ​​െൻറ ചാരുതയിൽ പ്രകടമാവും.     15,000 ചതുരശ്ര മീറ്റർ വലിപ്പമുള്ള പവലിയൻ 2019 അവസാനത്തോടെ പൂർത്തിയാവും.  ഏഴു മാസം നീണ്ടു നിന്ന മത്സരങ്ങളിലൂടെ ഒമ്പത്​ അന്താരാഷ്​ട്ര വാസ്​തുശിൽപ കമ്പനികൾ സമർപ്പിച്ച 11 ഡിസൈനുകൾ വിലയിരുത്തിയാണ്​ സാൻറിയാഗോ കലാട്രാവ മുന്നോട്ടുവെച്ച ഇൗ മാതൃക തെരഞ്ഞെടുത്തത്​. അന്താരാഷ്​ട്ര പ്രദർശനങ്ങളിൽ രാജ്യത്തി​​െൻറ പവലിയനുകൾ ഒരുക്കാൻ ചുമതല​യുള്ള നാഷനൽ മീഡിയാ കൗൺസിലാണ്​ ഇതിന്​ അംഗീകാരം നൽകിയത്​. ലുവ്​ർ അബൂദബി, അബൂദബി അന്താരാഷ്​ട്ര വിമാനത്താവള വികസനം തുടങ്ങിയ വൻകിട പദ്ധതികൾ നിർവഹിച്ച അറബ്​ടെക്​ കൺസ്​ട്രക്​ഷന്​ ആണ്​ നിർമാണ കരാർ.