ആഘോഷകാലം: തിരക്കിലമർന്ന്​ ദുബൈ വിമാനത്താവളം

ദുബൈ: ശൈത്യകാലത്തെ ഏറ്റവും തിരക്കേറിയ ആഘോഷകാലം വന്നെത്തിയതോടെ തിരക്കിലമർന്ന്​ ദുബൈ അന്താരാഷ്ട്ര വിമാനത്താവളം. ക്രിസ്മസും നവവൽസരവും ആഘോഷിക്കാൻ യു.എ.ഇയിലെത്തുന്നവരുടെയും വിവിധ രാജ്യങ്ങളിലേക്ക്​ മടങ്ങുന്ന താമസക്കാരുടെയും എണ്ണമാണ്​ യാത്രക്കാർ കുത്തനെ കൂടാൻ കാരണം. ദിവസവും ശരാശരി 2.58ലക്ഷം യാത്രക്കാർ വിമാനത്താവളം വഴി കടന്നുപോകുമെന്നാണ്​ വിലയിരുത്തപ്പെടുന്നത്​.

ഡിസംബർ 31വരെ തിരക്ക്​ തുടരും. ഇതിൽ ഡിസംബർ 22നായിരിക്കും​ ഏറ്റവും കൂടുതൽ യാത്രക്കാരെത്തുക, 2.79ലക്ഷം. രണ്ടാഴ്ചകളിലായി ആകെ 40ലക്ഷതതിലേറെ സഞ്ചാരികളാണ്​ വിമാനത്താവളം ഉപയോഗിക്കുക. യാത്രക്കാരുടെ എണ്ണം കൂടുന്നത്​ പരിഗണിച്ച്​ വിമാനത്താവളത്തിലെ ഒന്നും രണ്ടും മൂന്നും ടെർമിനലുകളിൽ വിപുലമായ സംവിധാനങ്ങൾ ഒരുക്കിയിട്ടുണ്ട്​.

മാത്രമല്ല, യാത്രക്കാർക്ക്​ വിനോദവും ആനന്ദവും പകരുന്നതിന്​ വിവിധ സംവിധാനങ്ങളുമുണ്ടാകും. വലിയ സ്​നോ ഗ്ലോബിൽ ത്രിഡി ഫോട്ടോ പകർത്താനുള്ള അവസരം, സാൻറാ ക്ലോസിന്‍റെ വേഷമണിഞ്ഞ്​ വിശേഷങ്ങൾ തിരക്കിയും സമ്മാനങ്ങൾ നൽകിയും കടന്നുപോകുന്ന കലാപ്രകടനം എന്നിവയും ഇതിൽ ഉൾപ്പെടും.

ദുബൈ വിമാനത്താവളത്തിലേക്ക്​ കൂടുതൽ വിമാനക്കമ്പനികളെയും വിമാനങ്ങളെയും സ്വീകരിക്കുന്നുണ്ടെന്നും ശൈത്യകാലത്തിന്‍റെ ആരംഭത്തിൽ ദുബൈയിലേക്ക്​ എത്തുന്ന സന്ദർശകരുടെയും ഇതുവഴി കടന്നുപോകുന്നവർക്കും സൗകര്യം പരിഗണിച്ചാണെന്നും ദുബൈ എയർപോർട്​സ്​ ടെർമിനൽ ഓപറേഷൻസ്​ വൈസ്​ പ്രസിഡൻറ്​ ഈസ അൽ ശംസി പറഞ്ഞു.

ആഘോഷ അവസരത്തിലെ യാത്ര എളുപ്പവും ആനന്ദകരവുമാക്കാൻ വിമാനത്താവള ജീവനക്കാർ പ്രതിജ്ഞാബദ്ധരാണെന്നും അദ്ദേഹം കൂട്ടിച്ചേർത്തു. തിരക്കൊഴിവാക്കാൻ ചില നിർദേശങ്ങളും അധികൃതർ പുറത്തിറക്കിയിട്ടുണ്ട്​.

എമിറേറ്റ്​സിന്‍റെ അറ്റ്​ ഹോം ചെക്​ ഇൻ സേവനം ഉപയോഗിക്കുക, വിമാനത്താവളത്തിൽ സെൽഫ്​ സർവീസ്​ ചെക്​പോയിന്‍റുകൾ ഉപയോഗിക്കുക, ദുബൈയിലും അജ്​മാനിലുമുള്ള സിറ്റി ചെക്​ ഇൻ പോയിൻറ്​ ഉപയോഗിക്കുക എന്നിവയാണ്​ പ്രധാന നിർദേശം. ടെർമിനൽ രണ്ടിൽ പുറപ്പെടുന്നതിന്‍റെ നാലു മണിക്കൂർ മുമ്പെങ്കിലും എത്തിച്ചേരാണ്​ ഫ്ലൈ ദുബൈ നിർദേശിച്ചിട്ടുള്ളത്​. എന്നാൽ ഒന്നാം ടെർമിനലിൽ മൂന്ന്​ മണിക്കൂറിന്​ മുമ്പ്​ എത്തിച്ചേരേണ്ടതില്ല.

ഓൺലൈൻ ചെക്​ ഇൻ ലഭ്യമായിടങ്ങളിൽ അതുപയോഗിക്കാനും കമ്പനി അറിയിച്ചിട്ടുണ്ട്​. 12വയസിൽ കൂടുതൽ പ്രായമുള്ള കുട്ടികളുമായി എത്തുന്ന കുടുംബങ്ങൾക്കും സ്മാർട്​ ഗേറ്റ്​ ഉപയോഗിച്ച്​ പാസ്​പോർട്​ എമിഗ്രേഷൻ പ്രക്രിയകൾ പൂർത്തിയാക്കാൻ സൗകര്യമുണ്ട്​.

യാത്രയുമായി ബന്ധപ്പെട്ട എല്ലാ നിർദേശങ്ങളും ശ്രദ്ധിക്കുകയും പോകേണ്ട സ്ഥലങ്ങളിലെ നിയന്ത്രണങ്ങൾ അറിഞ്ഞുവെക്കുകയും ചെയ്യണമെന്നും വിമാനത്താവള അധികൃതർ അറിയിച്ചു. അതോടൊപ്പം ആവശ്യമായ രേഖകൾ കയ്യിലുണ്ടെന്ന്​ ഉറപ്പുവരുത്താനും ആവശ്യപ്പെട്ടിട്ടുണ്ട്​.

ബാഗേജ്​ ക്ലിയറൻസ്​, സെക്യൂരിറ്റി പരിശോധന എന്നിവിടങ്ങളിൽ സമയം വൈകിപേപാകുന്നത്​ ഒഴിവാക്കാൻ ലഗേജിൽ പാടില്ലാത്ത വസ്തുക്കൾ ഹാൻഡ്​ ലഗേജിൽ വെക്കാനും, ലഗേജ്​ വീട്ടിൽ നിന്നുതന്നെ തൂക്കിനോക്കാനും നിർദേശിച്ചിട്ടുണ്ട്​.

തിരക്കേറിയ സമയങ്ങളിൽ യാത്രക്കാരെ മാത്രമേ ടെർമിനലിനകത്തേക്ക്​ പ്രവേശിപ്പിക്കുകയുള്ളൂ. അതിനാൽ യാത്ര പറച്ചിലിന്​ ടെർമിനലിനകത്ത്​ കയറാനാകുമെന്ന്​ പ്രതീക്ഷിക്കരുത്​. വിമാനത്താവള റോഡുകളിൽ വലിയ തിരക്ക്​ അനുഭവപ്പെടാനുള്ള സാധ്യത പരിഗണിച്ച്​ ഒന്ന്​, മൂന്ന്​ ടെർമിനലുകളിൽ വന്നിറങ്ങുന്നവർ മെട്രോ ഉപയോഗിക്കണമെന്നും അധികൃതർ ആവശ്യപ്പെട്ടിട്ടുണ്ട്​.