തീ ീ ീ... മിനാ സായിദിൽ ​ അച്ചടി ശാലക്ക്​ തീപിടിച്ചു

അബൂദബി: മിനാ സായിദ്​ വ്യവസായ മേഖലയിലെ ഗോഡൗണുകളിൽ വൻ അഗ്​നിബാധ. വെയർ ഹൗസിലെ പ്രിൻറിങ്​ പ്രസ്​ കോംപ്ലക്​സിലാണ്​ തീ പിടിച്ചത്​. കടലാസുകളും മറ്റ്​ അച്ചടി സാമഗ്രികളും ഉള്ളതു മൂലം തീ ആളി പടർന്നു. വ്യാഴാഴ്​ച പുലർച്ചെ രണ്ടരക്കാണ്​ അബൂദബി സിവിൽ ഡിഫൻസിൽ വിവരം ലഭിച്ചത്​. ഉടനെ അഗ്​നിശമന-രക്ഷാ പ്രവർത്തന സംഘം സംഭവസ്​ഥലത്തെത്തി തീ അണക്കാൻ തുടങ്ങി. മേഖലയിലെമ്പാടും പുക പടർന്നുവെങ്കിലും ആർക്കും അപായമില്ല. രക്ഷാ പ്രവർത്തനങ്ങൾക്ക്​ സിവിൽ ഡിഫൻസ്​ ജനറൽ കമാൻഡർ മേജർ ജനറൽ ജാസിം അൽ മർസൂഖി നേതൃത്വം നൽകി.  രക്ഷാപ്രവർത്തകർ പുലർത്തിയ ചടുലതയാണ്​ തീയുടെ വ്യാപ്​തി കുറക്കാനും എളുപ്പത്തിൽ നിയന്ത്രണ വിധേയമാക്കാനും സഹായിച്ചതെന്ന്​ അബൂദബി സിവിൽ ഡിഫൻസ്​ ഡയറക്​ടർ ജനറൽ കേണൽ മുഹമ്മദ്​ അബ്​ദുൽ ജലീൽ അൽ അൻസാരി പറഞ്ഞു.