അൽഖൂസിലെ ഗോഡൗണുകളിൽ വൻ തീപിടിത്തം

ദുബൈ: ചൊവ്വാഴ്​ച വൈകുന്നേരമുണ്ടായ തീ പിടിത്തത്തിൽ അൽഖൂസ്​ മേഖലയിലെ രണ്ട്​ കൂറ്റൻ ഗോഡൗണുകൾ ചാരമായി. തുണിത്തരങ്ങളും ഫർണീച്ചറുകളും സൂക്ഷിച്ച അൽ മനാറ സ്​ട്രീറ്റിലെ വെയർ ഹൗസുകളിലാണ്​ ഇന്നലെ വൈകീട്ട്​ അഞ്ചേ കാലോടെ തീ പിടിച്ചത്​. വിവരം ലഭിച്ച്​ അഞ്ചു മിനിറ്റ്​ തികയും മുൻപ്​ അഗ്​നിശമന സേനാ പ്രവർത്തനങ്ങൾ ആരംഭിച്ചതിനാൽ കൂടുതൽ മേഖലകളിലേക്ക്​ തീ പടരുന്നത്​ ഒഴിവായി. 

അൽ ഖൂസ്​, ബർഷ എന്നിവിടങ്ങളിൽ നിന്ന്​ അഗ്​നിശമന സേനയും സ്വദേശി സന്നദ്ധ പ്രവർത്തകരുമാണ്​ രക്ഷാ പ്രവർത്തനം നടത്തിയതെന്ന്​ ദുബൈ സിവിൽ ഡിഫൻസിലെ ലഫ്​.കേണൽ ജമാൽ അഹ്​മദ്​ അറിയിച്ചു. ആർക്കും പരിക്കേറ്റിട്ടില്ല. 5.40ന്​ തീ പരിപൂർണ നിയന്ത്രണ വിധേയമായി. ദുബൈ രാജകുമാരൻ ശൈഖ്​ മൻസൂർ ബിൻ മുഹമ്മദ്​ ബിൻ റാശിദ്​ ആൽമക്​തൂം രക്ഷാപ്രവർത്തനം ഏകോപിപ്പിക്കാൻ സംഭവസ്​ഥലത്തെത്തിയിരുന്നു.