സന്നദ്ധപ്രവർത്തന ക്രമീകരണ നിയമം  എഫ്​.എൻ.സി അംഗീകരിച്ചു

അബൂദബി: രാജ്യത്താകമാനമുള്ള സന്നദ്ധപ്രവർത്തനങ്ങൾ ക്രമീകരിക്കാനുള്ള കരടു നിയമത്തിന്​ ഫെഡറൽ നാഷനൽ കൗൺസിൽ (എഫ്​.എൻ.സി) അനുമതി നൽകി. സന്നദ്ധപ്രവർത്തന സംസ്​കാരം പോഷിപ്പിക്കുകയും ഇത്തരം പ്രവർത്തനങ്ങൾ വഴി സർക്കാർ നയങ്ങൾ കാര്യക്ഷമമായി പ്രയോഗവത്​കരിക്കുന്നുണ്ടെന്ന്​ ഉറപ്പ്​ വരുത്തുകയാണ്​ നിയമത്തി​​​െൻറ ലക്ഷ്യം.

രാജ്യത്തെ സന്നദ്ധപ്രവർത്തനങ്ങൾ ഏകോപിപ്പിക്കാനും സന്നദ്ധപ്രവർത്തകരെ രജിസ്​റ്റർ ചെയ്യാൻ പ്രേരിപ്പിച്ച്​ വിവിരശേഖരണം നടത്താനും നിയമം ആഹ്വാനം ചെയ്യുന്നു. യു.എ.ഇയിൽ പ്രവർത്തിക്കാൻ ലൈസൻസുള്ള സന്നദ്ധസംഘടനകൾ പ്രവർത്തകർക്ക്​ ആരോഗ്യകരവും സുരക്ഷിതവുമായ സാഹചര്യങ്ങൾ ഒരുക്കണമെന്നും ആവശ്യമായ പരിശീലനം നൽകണമെന്നും ഇൻഷുറൻസ്​ പരിരക്ഷ ലഭ്യമാക്കണമെന്നും നിയമം നിർദേശിക്കുന്നു. 

ദുബൈയിലെ സന്നദ്ധ പ്രവർത്തനങ്ങളുടെ ക്രമീകരണത്തിന്​ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം ഇൗയിടെ നിയമം പുറപ്പെടുവിച്ചിരുന്നു. സന്നദ്ധ പ്രവർത്തനം സംഘടിപ്പിക്കുകയോ സ്​പോൺസർ ചെയ്യുകയോ ചെയ്യുന്ന സ്​ഥാപനങ്ങൾ ദു​െബെ സാമൂഹിക വികസന അതോറി​റ്റിയിൽനിന്ന്​ (സി.ഡി.എ) നിർബന്ധമായും അനുമതി നേടിയിരിക്കണമെന്ന്​ നിയമം വ്യക്​തമാക്കുന്നു. സി.ഡി.എയിൽനിന്ന്​ അനുമതി നേടാതെ സന്നദ്ധസംഘത്തിന്​ ധനശേഖരണം നടത്താനോ ഏതെങ്കിലും മാധ്യമങ്ങളിലൂടെ പരസ്യം ചെയ്യാനോ അവകാശമില്ല. 
സന്നദ്ധ പ്രവർത്തനങ്ങൾ സംഘടിപ്പിക്കുന്ന സർക്കാർ^സ്വകാര്യ സ്​ഥാപനങ്ങൾ പ്രർത്തനങ്ങളും മാനദണ്ഡങ്ങളും നിയമങ്ങളും നിർവചിക്കുകയും അവയുടെ ഒരു പകർപ്പ്​ സി.ഡി.എക്ക്​ സമർപ്പിക്കുകയും ചെയ്യണം.

സന്നദ്ധ പ്രവർത്തകർക്ക്​ ആവശ്യമായ ഉപകരണങ്ങളും സുരക്ഷാ സംവിധാനങ്ങളും ലഭ്യമാക്കണം. പരിക്ക്​, പകർച്ചവ്യാധി തുടങ്ങിയവക്കെതിരെ ഇൻഷുറൻസ്​ പരിരക്ഷ നൽകണം. സി.ഡി.എ പുറത്തിറക്കുന്ന സന്നദ്ധ സേവന കരാറിൽ പ്രവർത്തകർ ഒപ്പിടണം. സന്നദ്ധ പ്രവർത്തകനും സ്​ഥാപനവും തമ്മിലുള്ള ബന്ധം ഇൗ കരാറിൽ വ്യക്​തമാക്കണം. സന്നദ്ധപ്രവർത്തകർ 18 വയസ്സിന്​ മുകളിലുള്ളവരായിരിക്കണമെന്നും 18 വയസ്സിൽ കുറഞ്ഞവരെ സന്നദ്ധപ്രവർത്തനത്തിന്​ ഉപയോഗപ്പെടുത്തുന്നുണ്ടെങ്കിൽ രക്ഷിതാക്കളുടെ അനുമതി നേടിയിരിക്കണമെന്നും ശൈഖ് മുഹമ്മദ് ബിൻ റാശിദ് ആൽ മക്തൂം പുറപ്പെടുവിച്ച നിയമം വ്യക്​തമാക്കുന്നു.