മൂടൽമഞ്ഞ്​: യു.എ.ഇയിലേക്കുള്ള 45 വിമാനങ്ങൾ വൈകി

അബൂദബി: ചൊവ്വാഴ്​ച പുലർച്ചെ അനുഭവപ്പെട്ട മൂടൽമഞ്ഞ്​ കാരണം യു.എ.ഇയിലെ വിവിധ അന്താരാഷ്​ട്ര വിമാനത്താവളങ്ങളിലെത്തേണ്ടിയിരുന്ന നിരവധി വിമാനങ്ങൾ വൈകി. അബൂദബി, ദുബൈ, ഷാർജ വിമാനത്താവളങ്ങളിലേക്കുള്ള വിമാനങ്ങളാണ്​ വൈകിയത്​. വിമാന ഗതാഗത വെബ്​സൈറ്റി​ലെ വിവരമനുസരിച്ച്​ 45ഒാളം വിമാനങ്ങളാണ്​ വൈകിയിരിക്കുന്നത്​. 

അബൂദബി അന്താരാഷ്​ട്ര വിമാനത്താവളത്തിൽ രാവിലെ 6.15ഒാടെ ഇറങ്ങേണ്ടിയിരുന്ന ഏഴോളം വിമാനങ്ങൾ വൈകി. അതേസമയം പുലർച്ചെ മൂന്ന്​ മുതൽ ആറ്​ വരെയുള്ള വിമാനങ്ങൾ കൃത്യസമയത്ത്​ തന്നെ അബൂദബിയിലെത്തി. ദുബൈ വിമാനത്താവളത്തിൽ പുലർച്ചെ മൂന്നിനും ആറിനും ഇടയിൽ ഇറങ്ങേണ്ടിയിരുന്ന 19 വിമാനങ്ങളാണ്​ വൈകിയത്​. എന്നാൽ, 50ലധികം വിമാനങ്ങൾ ഇൗ സമയത്തിനിടക്ക്​ ​െഷഡ്യൂൾ പ്രകാരം തന്നെ​ ലാൻഡ്​ ചെയ്​തു. ഷാർജ അന്താരാഷ്​ട്ര വിമാനത്താവളത്തിൽ പുലർച്ചെ മൂന്നിനും രാവിലെ ഒമ്പതിനും ഇടയിൽ 18ഒാളം വിമാനങ്ങൾ വൈകി. 

ചൊവ്വാഴ്​ച പുലർച്ചെ കനത്ത മൂടൽമഞ്ഞുണ്ടാകുമെന്ന്​ ദേശീയ കാലാവസ്​ഥനിരീക്ഷണ-ഭൂകമ്പശാസ്​ത്ര കേന്ദ്രം (എൻ.സി.എം.എസ്​) മുന്നറിയിപ്പ്​ നൽകിയിരുന്നു. വാഹനങ്ങൾ വേഗത കുറച്ച്​ പോകണമെന്നും വാഹനങ്ങൾക്കിടയിൽ ആവശ്യമായ അകലം പാലിക്കണമെന്നും മുന്നറിയിപ്പിലുണ്ടായിരുന്നു. രാവിലെ അഞ്ചിനും ഒമ്പതിനുമിടയിൽ കാഴ്​ചാപരിധി 500 മീറ്ററിലും കുറവായിരിക്കുമെന്നും അറിയിച്ചിരുന്നു. ബുധനാഴ്​ച പുലർച്ചെയും മൂടൽമഞ്ഞുണ്ടാകുമെന്ന്​ കേന്ദ്രം അറിയിച്ചിട്ടുണ്ട്​. ഉൾപ്രദേശങ്ങളിലായിരുന്നു മൂടൽമഞ്ഞ്​ കൂടുതലായുണ്ടായിരുന്ന​. റാസൽഖൈമയിലെ ജബൽ ജെയ്​സിലാണ്​ ഏറ്റവും കുറഞ്ഞ താപനില അനുഭവപ്പെട്ടത്​. രാവിലെ ആറോടെ 20.1 ഡിഗ്രി സെൽഷ്യസ്​ ആയിരുന്നു ചൊവ്വാഴ്​ച ഇവിടുത്തെ താപനില.