മുന്നണി പോരാളികൾ റാമ്പിലിറങ്ങി; ആദരമായി 'വൈറ്റ്​ കോട്ട്​' ഫാഷൻ ഷോ

അജ്​മാൻ: ആരോഗ്യ മേഖലയിലെ മുന്നണിപ്പോരാളികളെ ആദരിക്കുന്നതിന്​ ഫാഷൻ ഷോ സംഘടിപ്പിച്ചു. ഗൾഫ്​ മെഡിക്കൽ യൂനിവേഴ്​സിറ്റിയുടെ നേതൃത്വത്തിൽ അജ്​മാനിലാണ്​ ഫാഷൻ ഷോ അരങ്ങേറിയത്​.

'വാക്കിങ്​ ആർട്ട്​' എന്ന്​ പേരിട്ട പരിപാടിയിൽ ഡോക്​ടർമാരും നഴ്​സുമാരും ജീവനക്കാരും പൂർവ വിദ്യാർഥികളും വെള്ളക്കുപ്പായത്തിൽ അണിനിരന്നു. തുംബൈ യൂനിവേഴ്​സിറ്റി ഹോസ്​പിറ്റലിലെയും തുംബൈ ഗ്രൂപ്പിലെയും വിദ്യാർഥികളും പ​ങ്കെടുത്തു.

ആരോഗ്യ പ്രവർത്തകരുടെ വെള്ള കോട്ട്​ 27 വ്യത്യസ്​ത ഡിസൈനുകളിൽ ധരിച്ചായിരുന്നു മോഡലുകൾ റാമ്പിലിറങ്ങിയത്​. 35 പേരാണ്​ പ​ങ്കെടുത്തത്​​. കോവിഡ്​ കാലത്ത്​ മുൻനിരയിൽ പ്രവർത്തിച്ച ലോകത്താകമാനമുള്ള ആരോഗ്യ പ്രവർത്തകർക്ക്​ ആദരമായാണ്​ പരിപാടി സംഘടിപ്പിച്ചത്​.