ഗാർഡനിങ് ടിപ്സ്: കലാതിയ വൈറ്റ് ഫ്യൂഷൻ

മറാന്തേസി കുടുംബത്തിലെ പ്രയർ പ്ലാന്‍റി രാജ്ഞി എന്നറിയപ്പെടുന്ന ഒരു ചെടിയാണ് കലാതിയ വൈറ്റ് ഫ്യൂഷൻ. ഇതിന്‍റെ ഇലകളുടെ ഭംഗി കൊണ്ട് തന്നെയാണ് അങ്ങനെ പറയുന്നത്. കലാതിയ ചെടികളുടെ ഇലകൾ രാത്രിയിൽ മുകളിലോട്ട് മടങ്ങി നിക്കും. പ്രയർ പ്ലാന്‍റ്​ എന്ന് പേര് വരാൻ കാരണവും അതുതന്നെ. ഈ ചെടിയുടെ ഇലകളുടെ ഭംഗി കൊണ്ട് തന്നെ ഏവർക്കും ഏറെ പ്രിയമാണ് ഈ ചെടി.

ഈർപ്പം ഇഷ്ടപ്പെടുന്ന ചെടിയാണ്. അതികം സൂര്യപ്രകാശം വേണ്ട. മികച്ച വെളിച്ചം മതി. ഒരുപാട് വെയിൽ കൊണ്ടാൽ ഇതിന്‍റെ ഇലകൾ കരിഞ്ഞ് പോകും. മണ്ണ് പരിശോധിച്ച് വെള്ളം കൊടുക്കുക. ഒരുപാട് വെള്ളം കൊടുത്താൽ ചെടി ചീഞ്ഞ് പോകും. നല്ല ഡ്രെയ്​നേജ്​ സംവിധാനം ഉള്ള കലം എടുക്കുക. ഇലകൾ എല്ലാം മാസത്തിൽ ഒരു തവണ വൃത്തിയാക്കി എടുക്കുക. അത് വഴി പ്രകാശ സംശ്ലേഷണം നന്നായി നടക്കും. ചെടി നന്നായി വളരുകയും ചെയ്യും.

നല്ലൊരു ഇൻഡോർ ചെടി കൂടിയാണിത്​. ജനാലയുടെ അരികെ സൂര്യപ്രകാശം കിട്ടുന്ന സ്ഥലത്ത് വെക്കുക. ഈർപ്പം ഇഷ്ടപ്പെടുന്നത് കൊണ്ട് തന്നെ ഇതിന്‍റെ ചെടിച്ചട്ടിയിലെ മിശ്രിതങ്ങൾ ശ്രദ്ധിക്കണം. ചകിരിച്ചോർ, കമ്പോസ്റ്റ്, മണ്ണ്, പെർലൈറ്റ്​, എന്നിവ ആവശ്യാനുസരണം ചേർത്ത് യോജിപ്പിക്കുക. ചാണകപ്പൊടി, വളങ്ങൾ എന്നിവ ചേർക്കാം. ഇലകൾ ചീത്തയായി തുടങ്ങിയാൽ വെട്ടിഒതുക്കി നിർത്തണം.

ഒരു വർഷത്തിൽ കൂടുതൽ ആയ ചെടികൾ കലം മാറ്റി കൊടുക്കാം. ​പൊന്തയായി നിൽക്കുന്നതാണെങ്കിൽ വലിയ കലത്തിൽ വെക്കാം. പൂവുകൾ നുള്ളി കളയുന്നതാണ്​ നല്ലത്. പൂവുകൾ നിന്നാൽ ചെടിയുടെ വളർച്ചയെ ബാധിക്കും. ബാൽക്കണിയിൽ അതികം സൂര്യപ്രകാശം എൽക്കാത്തിടത്ത്​ നമ്മുക്ക് ഈ ചെടി വളർത്താം.

Haseena Riyas

Youtube: Gardeneca_home

Instagram: Gardeneca_home