ഗ്ലോബൽ കലാലയം പുരസ്‌കാരം പ്രഖ്യാപിച്ചു

മസ്കത്ത്: കലാലയം സാംസ്‌കാരിക വേദിയുടെ പ്രവാസി സാഹിത്യോത്സവിന്റെ ഭാഗമായി പ്രവാസി എഴുത്തുകാർക്ക് സംഘടിപ്പിച്ച കഥ, കവിത വിഭാഗങ്ങളിൽ ഗ്ലോബൽ കലാലയ പുരസ്‌കാര ജേതാക്കളെ പ്രഖ്യാപിച്ചു. അലി പൊന്നാനിയുടെ (സൗദി അറേബ്യ) ‘ഒറ്റച്ചിറകുള്ള പക്ഷികൾ’ എന്ന കഥയും അജ്മൽ റഹ്മാന്റെ (യു.എ.ഇ) ‘മണങ്ങള്‍’ എന്ന കവിതയുമാണ്​ പുരസ്കാരത്തിന്​ അർഹമായ രചനകൾ.

വിവിധ രാജ്യങ്ങളിലെ മലയാളി എഴുത്തുകാരിൽനിന്ന് ലഭിച്ച മികച്ച രചനകളുടെ അടിസ്ഥാനത്തിലാണ് പുരസ്‌കാരത്തിന് തിരഞ്ഞെടുത്തത്.ഡോ. കെ.വി. തോമസ്, ആലങ്കോട് ലീലാകൃഷ്ണന്‍, മൂസ ബുഖാരി ചേലക്കര, സിദ്ദീഖ്‌ ബുഖാരി ബാപ്പുഞ്ഞി എന്നിവരടങ്ങുന്ന ജൂറിയാണ് പുരസ്‌കാര ജേതാക്കളെ തിരഞ്ഞെടുത്തത്.

കഥ, കവിത വിഭാഗങ്ങളില്‍ മികച്ച രചനകളാണ് ലഭിച്ചതെന്ന് ജൂറി അഭിപ്രായപ്പെട്ടു. പുരസ്‌കാര ജേതാക്കള്‍ക്ക് പ്രവാസി സാഹിത്യോത്സവ് വേദിയിൽ ഫലകവും അനുമോദനപത്രവും നൽകും.