​േഗ്ലാബൽ വില്ലേജ്​ തുറന്നു; ബസ്​ സർവിസ്​ പുനരാരംഭിച്ചു

ദുബൈ: ദുബൈയുടെ ടൂറിസ്​റ്റ്​ സീസ​​െൻറ വരവറിയിച്ച്​ ​േഗ്ലാബൽ വില്ലേജ്​ തുറന്നു. ഏപ്രിൽ പത്തു​ വരെയാണ്​ 26ാം സീസൺ. എക്​സ്​പോ 2020 നടക്കുന്ന സാഹചര്യത്തിൽ കൂടുതൽ സന്ദർശകരെ പ്രതീക്ഷിച്ചാണ്​ ആഗോള ഗ്രാമത്തി​െൻറ വാതിലുകൾ തുറന്നത്​. ഓൺലൈൻ വഴി ടിക്കറ്റ്​ ബുക്ക്​ ചെയ്യുന്നവർക്ക്​ 15 ദിർഹമാണ്​ നിരക്ക്​. നേരി​ട്ടെത്തി ടിക്കറ്റെടുത്താൽ 20 ദിർഹം.

വില്ലേജ്​ തുറന്നതോടെ ഇവിടേക്കുള്ള ബസ്​ സർവിസും പുനരാരംഭിച്ചു. ഇതിന്​ പുറമെ ​േഗ്ലാബൽ വില്ലേജിനെയും എക്​സ്​പോയെയും ബന്ധിപ്പിക്കുന്ന സർവിസുമുണ്ടാകും. ​േഗ്ലാബൽ വില്ലേജിലേക്ക്​ നേരിട്ട്​ നാല്​ സർവിസുകളാണുള്ളത്​. റാശിദീയയിൽ നിന്ന്​ 60 മിനിറ്റ്​ ഇടവേളയിൽ റൂട്ട്​​ 102, യൂനി​യൻ സ്​ക്വയറിൽ നിന്ന്​ 40 മിനിറ്റ്​ ഇടവേളയിൽ​ 103, അൽ ഗുബൈബ സ്​റ്റേഷനിൽ നിന്ന്​ 60 മിനിറ്റിൽ റൂട്ട്​ 104, മാൾ ഓഫ്​ എമിറേറ്റ്​സിൽ നിന്ന്​ 60 മിനിറ്റിൽ റൂട്ട്​ 106 എന്നിവയാണ്​ പ്രധാന സർവിസുകൾ. പത്ത്​ ദിർഹമാണ്​ ടിക്കറ്റ്​ നിരക്ക്​. ഡീലക്​സ്​ കോച്ചുകളും സാധാരണ ബസുകളും ഈ റൂട്ടിൽ സർവിസ്​ നടത്തും. ദിവസവും വൈകുന്നേരം നാല്​ മുതൽ രാത്രി 12 ​വരെയാണ്​ ​േഗ്ലാബൽ വില്ലേജ്​ തുറന്നിരിക്കുക. വ്യാഴം, വെള്ളി ദിവസങ്ങളിൽ ഒരു മണി വരെയായിരിക്കും പ്രവർത്തനം. തിങ്കളാഴ്​ചകളിൽ കുടുംബങ്ങൾക്ക്​ മാത്രമാണ്​ പ്രവേശനം. എന്നാൽ, പൊതു അവധികൾ വരുന്ന തിങ്കളാഴ്​ചകളിൽ എല്ലാവർക്കും പ്രവേശനമുണ്ടാകും. ഈ സമയങ്ങളിലെല്ലാം ബസ്​ സർവിസ്​ ഉണ്ടാകും.

പുതുമകളോടെയാണ്​ 26ാം സീസൺ തുടങ്ങുന്നത്​​. സംഗീത പരിപാടികൾ നടത്താൻ വലിയ സ്​റ്റേജുകൾ ഇക്കുറി ഒരുക്കിയിട്ടുണ്ട്​. പുതിയ ഇറാഖി പവലിയനും ഈ സീസണി​െൻറ പ്രത്യേകതയാണ്​. സന്ദർശകർക്ക്​ കൂടുതൽ ​സീറ്റിങ്​ ഏരിയകൾ തയാറായി​. ഫോ​ട്ടോ എടുക്കുന്നവർക്കായി ഇൻസ്​റ്റലേഷനുകൾ സ്​ഥാപിച്ചിട്ടുണ്ട്​. പീറ്റർ റാബിറ്റ്​ അഡ്വഞ്ചർ സോൺ, ഫയർ ഫൗണ്ടെയ്​ൻ ഷോ, വാട്ടർ സ്​റ്റണ്ട്​ ഷോ എന്നിവയും ഈ സീസണിലെത്തും.

അതേസമയം, മിറക്ക്​ൾ ഗാർഡനിലേക്കുള്ള ബസ്​ സർവിസും ആർ.ടി.എ പുനരാരംഭിച്ചു​. മാൾ ഓഫ്​ എമിറേറ്റ്​സിൽ നിന്ന്​ 105ാം നമ്പർ ബസാണ്​ സർവിസ്​ നടത്തുന്നത്​. 30 മിനിറ്റ്​ ഇടവേളയിൽ സർവിസുണ്ടാകും. വെള്ളി, ശനി ദിവസങ്ങളിൽ 20 മിനിറ്റ്​ ഇടവേളയിൽ ബസുണ്ട്​. അഞ്ച്​ ദിർഹമാണ്​ ടിക്കറ്റ്​ നിരക്ക്​.