ഗ്ലോബൽ വില്ലേജ്​ ഇന്ന്​ തുറക്കുന്നു

ദുബൈ: വ്യത്യാസങ്ങളെല്ലാം മറന്ന്​ വൈവിധ്യങ്ങളെ പുണർന്ന്​ ഇനി 158 ദിനങ്ങൾ ലോകം ദുബൈയിൽ ഒന്നിക്കും. ഗ്ലോബൽ വില്ലേജി​​െൻറ 22ാം അധ്യായത്തിന്​ ഇന്ന്​ തുടക്കമാവുന്നു.  27 പവലിയനുകളിലായി ലോകത്തെ 75 സംസ്​കാരങ്ങളെ പരിചയപ്പെടുത്തുന്ന, ആനന്ദം ​െകാണ്ട്​ ഹൃദയങ്ങളെ അടുപ്പിക്കുകയും ആവേശക്കാഴ്​ചകൾ കൊണ്ട്​ ത്രസിപ്പിക്കുകയും ചെയ്യുന്ന ആഗോള ഗ്രാമത്തിന്​ ‘വരൂ ലോകത്തെ അനുഭവിച്ചറിയൂ’ എന്ന പ്രമേയമാണ്​ ഇക്കുറി.

പന്തീരായിരത്തിലേറെ സാംസ്​കാരിക^വിനോദ പരിപാടികൾ, ബോളിവുഡിൽ നിന്നും അറബ്​ മേഖകളിൽ നിന്നുമുൾപ്പെടെ നൂറു കണക്കിന്​ കലാകാർ അണിനിരക്കുന്ന നൃത്ത സംഗീത പരിപാടികൾ,  കാർണവൽ എന്നു പേരിട്ട അതിനൂതന റൈഡുകളും സ്​കിൽ ഗെയിമുകളും , കുട്ടികൾക്കുള്ള കിടിലൻ ഗെയിമുകൾ, നൂറിലേറെ രുചിശാലകളിലായി ലോകത്തി​​െൻറ സകല കോണുകളിൽ നിന്നുമുള്ള ഭക്ഷണ വിഭവങ്ങൾ എന്നിവയുമെല്ലാം ആഗോള ഗ്രാമത്തിലുണ്ടാവും.

എല്ലാ വെള്ളിയാഴ്​ചകളിലും രാത്രി ഒമ്പതിന്​ സംഗീത പരിപാടികളുണ്ടാവും. മലയാളികളുടെ പ്രിയ​ ഗായികയായ ശ്രേയാ ഘോഷാലും എത്തുന്നുണ്ട്​. 18300 വാഹന പാർക്കിങ്​ ലോട്ടുകളാണ്​ ഇക്കുറിയുണ്ടാവുക. ആദ്യമായി ബൈക്കുകൾക്ക്​ വേണ്ടിയും പ്രത്യേക പാർക്കിങ്​ ഇടം ക്രമീകരിച്ചിട്ടുണ്ട്​. റാശിദീയ, മാൾ ഒഫ്​ എമിറേറ്റ്​സ്​ മെട്രോ സ്​റ്റേഷൻ എന്നിവിടങ്ങളിൽ നിന്ന്​ പുതുതായി തുടങ്ങിയതുൾപ്പെടെ നാല്​ ബസ്​ റൂട്ടുകൾ ഇവിടേക്കുണ്ട്​. വില്ലേജിന്​ ചുറ്റുമായി പതിനായിരത്തിലേറെ മരങ്ങളാണ്​ പുതുതായി നട്ട​​ുപിടിപ്പിച്ചത്​.