യാത്രാതടസ്സം നീക്കാൻ സർക്കാർ ഇടപെടണം –ദുബൈ കെ.എം.സി.സി

ദുബൈ: പ്രവാസി ഇന്ത്യക്കാർക്ക് യു.എ.ഇയിലേക്ക് തിരിച്ചുവരാൻ​ പ്രതിബന്ധങ്ങൾ പരിഹരിക്കാൻ ഇന്ത്യൻ സർക്കാർ നടപടി സ്വീകരിക്കണമെന്ന് ദുബൈ കെ.എം.സി.സി ആവശ്യപ്പെട്ടു.

യു.എ.ഇയിൽനിന്ന് ഒരു വാക്​സിൻ എടുത്ത് നാട്ടിൽപോയി അവിടെ കുടുങ്ങിയവർക്കും യു.എ.ഇ അംഗീകാരമില്ലാത്തതും ഇന്ത്യയിൽ അംഗീകൃതവുമായ വാക്​സിൻ രണ്ടും എടുത്തവർക്കം മടങ്ങിവരുന്നതിന് സർക്കാർതലത്തിൽ ഇടപെടണമെന്നും വിസ കാലാവധി കഴിഞ്ഞ് തിരിച്ചുവരാൻ കഴിയാത്തവർക്ക് മടങ്ങിവരാൻ സാഹചര്യം ഒരുക്കണമെന്നും പ്രസ്​താവനയിൽ ആവശ്യപ്പെട്ടു.

ഇതുസംബന്ധിച്ച നിവേദനം ആക്ടിങ്​ പ്രസിഡൻറ്​ ഹനീഫ് ചെർക്കള, ആക്​ടിങ് ജ. സെക്രട്ടറി ഇസ്​മാഈൽ അരൂക്കുറ്റി, ഓർഗനൈസിങ്​ സെക്രട്ടറി ഹംസ തൊട്ടി, സെക്രട്ടറി അഡ്വ. ഇബ്രാഹീം ഖലീൽ തുടങ്ങിയവർ കോൺസുലേറ്റിൽ എത്തി കോൺസുലർമാരായ താദു മാമു, നേഗിന്ദര്‍ സിങ്​ എന്നിവര്‍ക്ക് കൈമാറി.