പുതുരുചിയുടെ പൂരം തീർത്ത്​ ഡെസർട്ട്​ മാസ്​റ്റർ; രുചി റാണിയായി ഹസീബ അബ്​ദുല്ല

ദുബൈ: രുചിയുടെ രസമുകുളങ്ങൾ പുതുനാ​െമ്പടുത്ത 'ഗൾഫ്​ മാധ്യമം' ഡെസർട്ട്​ മാസ്​റ്റർ പാചക മത്സരത്തിന്​ ​ സമാപനം. ദുബൈ അൽനെഹ്​ദ നെസ്​റ്റോ ഹൈപ്പർമാർക്കറ്റിൽ നടന്ന​ ഗ്രാൻഡ്​ ഫിനാലെയിൽ കണ്ണൂർ സ്വദേശിനി ഹസീബ അബ്​ദുല്ല ഡെസർട്ട്​ രുചികളുടെ റാണിയായി. കാസർകോട്ടുകാരി ഉദായത്ത്​ ഷാൻ റംസാൻ ഒന്നാം റണ്ണറപ്പും തൃശൂർ സ്വദേശി ഫെമിന സുധീർ രണ്ടാം റണ്ണറപ്പുമായി. ഒന്നിനൊന്ന്​ മികച്ച വൈവിധ്യങ്ങളൊരുക്കി ഏഴ്​ പേരാണ്​ ഫൈനലിൽ മാറ്റുരച്ചത്​.

കോവിഡ്​ മാനദണ്ഡങ്ങൾ പാലിച്ച്​ തുറന്ന വേദിയിൽ നടന്ന മത്സരം വീക്ഷിക്കാൻ നൂറുകണക്കിനാളുകൾ എത്തിയിരുന്നു​. ​േകാവിഡ്​ എത്തിയ ശേഷം ഒരു മാധ്യമ സ്​ഥാപനം യു.എ.ഇയിലെ തുറന്നവേദിയിൽ നടത്തുന്ന ആദ്യത്തെ തത്സമയ പാചക മത്സരം കൂടിയായി 'ഡെസർട്ട്​ മാസ്​റ്റർ'. സെലിഫ്രിറ്റി ഷെഫും മജീഷ്യനുമായ രാജ്​ കലേഷായിരുന്നു അവതാരകൻ.

ഒരു മണിക്കൂറായിരുന്നു സമയം അനുവദിച്ചത്​. പുതുമയുള്ള രുചികളാണ്​ ഏഴ്​ പേരും പരിചയപ്പെടുത്തിയതെന്നും എല്ലാം ഒന്നിനൊന്ന്​ മികച്ചതായിരുന്നെന്നും വിധികർത്താക്കളും പാചകവിദഗ്​ദരുമായ രാജ്​ കലേഷ്​, ബീഗം ഷാഹിന, രഘു കുമാർ, മുഹമ്മദ്​ കുഞ്ഞ്​ എന്നിവർ അഭിപ്രായപ്പെട്ടു. മത്സരം വീക്ഷിക്കാനെത്തിയ കാണികൾക്കും സമ്മാനങ്ങൾ ഒരുക്കിയിരുന്നു.

രണ്ടര മാസത്തോളം 'ഗൾഫ്​ മാധ്യമ'ത്തി​െൻറ സാമൂഹിക മാധ്യമങ്ങൾ വഴി നടത്തിയ മത്സരത്തിനൊടുവിലാണ്​ ഫൈനലിസ്​റ്റുകളെ നിശ്​ചയിച്ചത്​. സാധാരണ പാചക മത്സരങ്ങളിൽ നിന്ന്​ വ്യത്യസ്​തമായി ഡെസർട്ട്​ രുചികൾ മാത്രമായിരുന്നു ക്ഷണിച്ചിരുന്നത്​. ലോക്​ഡൗൺ സമയത്ത്​ ഉടലെടുത്ത പുതിയ ആശയങ്ങളായിരുന്നു കൂടുതൽ മത്സരാർഥികളും സാമൂഹിക മാധ്യമങ്ങൾ വഴി പങ്കുവെച്ചത്​. ഇവരിൽ നിന്ന്​ രണ്ട്​ തവണ​ ഷോർട്​ ലിസ്​റ്റ്​ ചെയ്​താണ്​ ഗ്രാൻഡ്​ ഫിനാലെക്ക്​ അവസരം നൽകിയത്​. വിജയിക്ക്​ ന്യൂട്രിഡോർ സി.ഇ.ഒ ശങ്ക ബിഷ്വാസ് സമ്മാനം കൈമാറി. ഗൾഫ്​ മാധ്യമം -മീഡിയവൺ മിഡ്​ൽഈസ്​റ്റ്​ ഓപറേഷൻസ്​ ഡയറക്​ടർ മുഹമ്മദ്​ സലീം അമ്പലൻ, നെസ്​റ്റോ ഗ്രൂപ്പ്​ മാനേജിങ്​ ഡയറക്​ടർ സിദ്ധീഖ്​ പാ​േലാള്ളതിൽ,നെസ്റ്റോ അൽ നഹ്ദ ജനറൽ മാനേജർ ജറീഷ്, ഗൾഫ്​ മാധ്യമം മാർക്കറ്റിങ്​ മാനേജർ ഹാഷിം ജെ.ആർ എന്നിവർ പ​െങ്കടുത്തു.