ഗൾഫ്​ മാധ്യമം എജുകഫെക്ക്​ ഷാർജയിൽ ​പ്രൗഢ തുടക്കം

ഷാർജ: മിഡ്​ൽ ഈസ്റ്റിലെ ഏറ്റവും വലിയ ഇന്ത്യൻ വിദ്യാഭ്യാസ-കരിയർ ​മേളയായ 'ഗൾഫ്​ മാധ്യമം' എജുകഫെ എട്ടാം സീസണ്​ ഷാർജ എക്സ്​പോ സെന്‍റററിൽ തുടക്കം. റൂളേഴ്​സ്​ ഓഫിസ്​ ചെയർമാൻ ശൈഖ്​ സാലിം ബിൻ അബ്​ദുൽ റഹ്​മാൻ അൽ ഖാസിമി ഉദ്​ഘാടനം ചെയ്തു. ഷാർജ ചേംബർ ഓഫ്​ കൊമേഴ്​സ്​ ആൻഡ്​ ഇൻഡസ്​ട്രി ചെയർമാൻ അബ്​ദുല്ല സുൽത്താൻ അൽ ഉവൈസ്​, ഷാർജ എക്സ്​പോ​ സെന്‍ററർ സൈഫ്​ മുഹമ്മദ്​ അൽ മിദ്​ഫ, ദുബൈ ഇന്ത്യൻ കോൺസുലേറ്റിലെ പാസ്​പോർട്ട്​ ആൻഡ്​ അറ്റസ്​റ്റേഷൻ വിഭാഗം കോൺസുൽ രാംകുമാർ തങ്കരാജ്​, ഗൾഫ്​ മാധ്യമം ചീഫ്​ എഡിറ്റർ വി.കെ. ഹംസ അബ്ബാസ്​ തുടങ്ങിയവർ പ​ങ്കെടുത്തു.

22 വരെ നീണ്ടുനിൽക്കും. യു.എ.ഇ വിദ്യാഭ്യാസ മന്ത്രാലയത്തിന്‍റെ സഹകരണത്തോടെ നടക്കുന്ന അന്താരാഷ്ട്ര വിദ്യാഭ്യാസ പ്രദർശനത്തിനൊപ്പമാണ്​ ഇക്കുറി എജുകഫെയും അരങ്ങേറുന്നത്​. ഇന്ത്യൻ പവലിയന്‍റെ ചുമതലയും 'ഗൾഫ്​ മാധ്യമ'ത്തിനാണ്​. ഇന്ത്യൻ പവലിയന്‍റെ ഉദ്​ഘാടനവും ​​ശൈഖ്​ സാലിം ബിൻ അബ്​ദുൽ റഹ്​മാൻ നിർവഹിച്ചു.

ആദ്യ ദിവസം രാവിലെ മുതൽ വിദ്യാർഥികളുടെ ഒഴുക്കാണ്​ എക്സ്​പോ സെന്‍ററിലേക്ക്​. രണ്ടാം ദിനമായ വ്യാഴാഴ്​ച രാവിലെ 9.30 മുതൽ എജുകഫെയിൽ വിവിധ സെഷനുകൾ അരങ്ങേറും. ​ഡോ. എ.പി.ജെ അബ്​ദുൽ കലാമിന്‍റെ സന്തത സഹചാരിയും എഴുത്തുകാരും പ്രഭാഷകനുമായ ശ്രീജൻപാൽ സിങ്​, അവതാരകനും കേരള യൂനിവേഴ്​സിറ്റി അസിറ്റ്​ന്‍റ്​ പ്രൊഫസറുമായ ഡോ. അരുൺകുമാർ, മജീഷ്യൻ രാജ മൂർത്തി, പ്രചോദക പ്രഭാഷകൻ മാണി പോൾ, ബയോ ഹാക്കിങ്​ വിദഗ്ദൻ മഹ്​റൂഫ്​ എന്നിവർ വരും ദിവസങ്ങളിൽ വേദിയിലെത്തും. വിദ്യാർഥികളിലെ മിടുക്കൻമാരെ കണ്ടെത്താൻ ഡോ. എ.പി.ജെ. അബ്​ദുൽ കലാമിന്‍റെ പേരിൽ സംഘടിപ്പിക്കുന്ന പുരസ്​കാരം ഇക്കുറിയുമുണ്ടാകും. എജുകഫെ സന്ദർശിക്കുന്ന 50ഓളം പേർക്ക്​ ഒമാനിലെ മുസന്ദത്തിലേക്ക്​ സൗജന്യ ട്രിപ്പിനുള്ള അവസരമുണ്ടാകും. യു.എ.ഇയിലെ പ്രമുഖ സ്കൂളുകളിലെ ​പ്രിൻസിപ്പൽമാർ അണിനിരക്കുന്ന പാനൽ ഡിസ്കഷനാണ്​ ഇത്തവണത്തെ മറ്റൊരു പ്രത്യേകത.

ഇന്ത്യയിലെയും വിദേശത്തെയും കോളജുകൾ, സ്കൂളുകൾ, യൂനിവേഴ്​സിറ്റികൾ, മെഡിക്കൽ വിദ്യാഭ്യാസ സ്ഥാപനങ്ങൾ, കരിയർ ഗൈഡൻസ്​ സെന്‍ററുകൾ, ഡിസ്റ്റൻസ്​ ലേണിങ്​ ഇൻസ്റ്റിറ്റ്യൂട്ടുകൾ, ഇമിഗ്രേഷൻ കൺസൾട്ടന്‍റുകൾ തുടങ്ങിയവരെല്ലാം എജുകഫെയിൽ പ​ങ്കെടുക്കുന്നുണ്ട്​. വിദേശരാജ്യങ്ങളിലെ കോഴ്​സുകളെ ​കുറിച്ചും ജോലി സാധ്യതകളെ കുറിച്ചുമെല്ലാം വ്യക്​തമാക്കുന്ന വിവിധ സെഷനുകൾ അരങ്ങേറും.

ഷാർജ പുസ്​തകോത്സവത്തിന്‍റെ വേദിയായ എക്സ്​പോ സെന്‍ററിലേക്ക്​ ആദ്യമായാണ്​ എജുകഫെ വിരുന്നെത്തുന്നത്​. പാർക്കിങും പ്രവേശന ഫീസും സൗജന്യമാണ്​. കഴിഞ്ഞ ഏഴ്​ സീസണുകളിൽ വിദ്യാഭ്യാസ മേഖലക്ക്​ നൽകിയ സംഭാവനകൾ പരിഗണിച്ചാണ്​ അന്താരാഷ്ട്ര വിദ്യാഭ്യാസ പ്രദർശനത്തിൽ എജുകഫെയെയും ഉൾപെടുത്തിയത്​. ബുധൻ, വ്യാഴം ദിവസങ്ങളിൽ രാവിലെ ഒമ്പത്​ മുതൽ വൈകുന്നേരം മൂന്ന്​ വരെയും വെള്ളി, ശനി ദിവസങ്ങളിൽ വൈകുന്നേരം മൂന്ന്​ മുതൽ രാത്രി ഒമ്പത്​ വരെയുമാണ്​ പ്രവേശനം.